Паводле праваабаронцаў, Ібрагімаў быў выкрадзены невядомымі недалёка ад Праабражэнскай пракуратуры Масквы, куды ён быў запрошаны. Яны заявілі Ібрагімаву, што той пазбаўлены расейскага грамадзянства, і адабралі ў яго пашпарт грамадзяніна Расеі. Афіцыйна яго да гэтага часу не апавясьцілі аб пазбаўленьні грамадзянства РФ.
Потым Максуда Ібрагімава супраць яго волі адвезьлі ў аэрапорт і без дакумэнтаў, у багажным адсеку, адправілі ў Душанбэ. Па прыбыцьці Ібрагімава пад катаваньнямі прымусілі заявіць пра тое, што ён прыляцеў у Таджыкістан добраахвотна.
Яго абвінавачваюць ва ўдзеле ў «Групе 24», ён гэта адмаўляе і пацьвярджае, што ўдзельнічаў толькі ў стварэньні «Моладзевага дэмакратычнага руху за адраджэньне Таджыкістану» ў Расеі.
Максуду Ібрагімаву 37 гадоў, ён заснавальнік і старшыня расейскай моладзевай грамадзкай арганізацыі «Моладзь Таджыкістану за адраджэньне». Член кіраўнічай рады кааліцыі апазыцыйных сіл «Новы Таджыкістан», у якую ўваходзіць і «Група 24». У кастрычніку 2014 Вярхоўны суд Таджыкістану абвясьціў «Групу 24» «экстрэмісцкай арганізацыяй».
Запыты адваката Ібрагімава ў Фэдэральную міграцыйную службу Расеі і органы пракуратуры застаюцца без адказу.
Асацыяцыя «Правы чалавека ў Цэнтральнай Азіі» выказала занепакоенасьць у сувязі з шырокамаштабным перасьледам актывістаў кааліцыі апазыцыйных сіл «Новы Таджыкістан», у якую ўваходзяць нефармальныя арганізацыі «Моладзь Таджыкістану за адраджэньне» і «Група 24».
Між тым у Менску вырашаецца пытаньне аб экстрадыцыі Шабнам Худайдодавай, актывісткі «Групы 24», затрыманай 15 чэрвеня сёлета пры пераходзе расейска-беларускай мяжы. 29-гадовая актывістка «Групы 24», маці непаўналетняй дачкі, папрасіла абароны ў беларускіх уладаў.
У Таджыкістане актывістку абвінавачваюць за «саўдзел у злачынстве». Эўрапейскі зьвяз зьвярнуўся да беларускіх уладаў з просьбай не выдаваць затрыманую Таджыкістану.
