Лінкі ўнівэрсальнага доступу

Посткамуністычныя сябры ЭЗ раскрытыкавалі вынікі грэцкага рэфэрэндуму


Той факт, што грэкі адкінулі рэформы, ня можа азначаць, што грошы дастануцца ім цяпер лягчэй, напісаў у сваім Твітэры міністар фінансаў і віцэ-прэм’ер Славаччыны Пэтэр Кажымір. Ён назваў выхад Грэцыі з эўразоны «рэалістычным сцэнаром».

Зыходзячы з вынікаў рэфэрэндуму ў Грэцыі, «можна зрабіць выснову, што Грэцыя сказала "не" атрыманьню дапамогі ад міжнародных партнэраў і знаходжаньню ў эўразоне», — лічыць міністар фінансаў Латвіі Яніс Рэйрс. На яго думку, урад Грэцыі давёў свой народ да катастрофы.

Эстонскі прэм’ер Тааві Рыйвас канстатаваў, што «рэформы ў Грэцыі па-ранейшаму непазьбежныя, і рашэньне адхіліць міжнародную прапанову аб дапамозе робіць сытуацыю крытычнай».

Левацэнтрысцкі ўрад Славеніі выступіў з рэзкай заявай. Адзначыўшы, што чакае ад Атэнаў «пераканаўчага пляну структурных рэформаў у Грэцыі», урад Славеніі папярэдзіў, што «не пагодзіцца на якія-небудзь экспэрымэнты грэцкага ўраду».

Польшча ў эўразону не ўваходзіць, але, як нагадаў яе міністар фінансаў Матэуш Шчурэк, удзельнічае ў дыскусіі з нагоды Грэцыі «як краіна, зацікаўленая ў будучыні эўразоны, прычым ня толькі ў якасьці магчымага чальца, але і як эканамічны партнэр». Да таго ж Варшава прымае ўдзел у прыняцьці рашэньняў на ўзроўні ўсяго ЭЗ.

Мяркуючы па апытаньні сацыялягічнага інстытуту IBRIS, апублікаванага газэтай Rzeczpospolita, 60% польскіх грамадзянаў супраць таго, каб ЭЗ працягнуў аказаньне фінансавай дапамогі Грэцыі. За далейшую дапамогу выказаліся ў два разы менш апытаных. Пры гэтым найбольшую гатоўнасьць і далей даваць грошы Атэнам (57%) выказалі маладыя палякі ва ўзросьце ад 25 да 34 гадоў. Ва ўзроставай групе ад 45 да 54 гадоў амаль тры чвэрці жыхароў краіны выступілі супраць новых крэдытаў.

Паводле «Нямецкай хвалі»

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG