Старшыня Менскага аблвыканкаму Сямён Шапіра падчас выязной канферэнцыі ў Крупскім раёне заявіў, што Дзяржынск, Заслаўе і Фаніпаль больш не разглядаюцца як стратэгічныя пункты для забесьпячэньня кватэрамі менчукоў.
Паводле чыноўніка, раней плянавалася, што сталічнымі гарадамі-спадарожнікамі будуць шэсць населеных пунктаў — Дзяржынск, Заслаўе, Лагойск, Рудзенск, Смалявічы і Фаніпаль. Аднак, як высьветліла экспэртная камісія, у Дзяржынска, Фаніпаля і Заслаўя няма магчымасьцяў ствараць працоўныя месцы побач з тэрыторыяй пражывання і разьвіваць сацыяльную інфраструктуру.
Такім чынам, прынамсі жыхары Фаніпаля могуць адзначыць лякальную перамогу. Радыё Свабода паведамляла, што ў сярэдзіне красавіка тут адбыўся стыхійны сход мясцовых жыхароў: людзі абураліся намерам уладаў пераўтварыць колішняе мястэчка ў паказальны сталічны «апэндыкс», зруйнаваўшы прыватны сэктар і збудаваўшы на гэтым месцы шматпавярховыя дамы. Адметна, што пра такія пляны бальшыня фаніпальцаў даведаліся выпадкова.
Згодна з Генэральным плянам пэрспэктыўнага выкарыстаньня тэрыторыяў «спадарожніка», зносу падлягала цэнтральная частка Фаніпаля, дзе сканцэнтраваная прыватная забудова. Агулам — блізу 250 дамоў пры вуліцах Чыгуначнай, Купалы, Камсамольскай, Леніна і некаторых іншых — раёне, які лічыцца гістарычным, бо менавіта адсюль разрастаўся ўшыркі будучы горад. Пэрспэктыва ўбачыць на іх месцы «бэтонныя каробкі» тутэйшых жыхароў абурыла.
Выглядае, што пратэст супраць зносу прыватных пабудоваў і ўзьвядзеньня на іх месцы шматкватэрных дамоў усё ж быў пачуты. Прынамсі Генэральны плян разьвіццьця Фаніпаля накіраваны на перапрацоўку, усхваляваных гаспадароў просяць не турбавацца.
На гэты момант абласныя ўлады плянуюць будаваць кватэры для сталічных жахароў у Смалявічах, дзе першы жылы дом ужо стаіць. Гэтаксама будзе актыўна асвойвацца Рудзенск, якому ў будучым наканавана стаць галоўным горадам-спадарожнікам Менска.
