У сталіцы Лібіі Трыпалі баевікі сёньня атакавалі консульства Тунісу і ўзялі 10 супрацоўнікаў у закладнікі.
Міністэрства замежных справаў Тунісу назвала тое, што здарылася, «абуральным парушэньнем дзяржаўнага сувэрэнітэту Тунісу і міжнароднага права».
Трыпалі ад лета 2014 кантралюе паўстанцкая групоўка «Зара Лібіі», якая сфармавала свой урад у Лібіі – у процівагу выгнанаму ў Тобрук ўраду Абдулы аль-Тхіні, які прызнаны міжнароднай супольнасьцю.
Пасьля скіданьня рэжыму палкоўніка Муамара Кадафі ў 2011 годзе Лібію разьдзіраюць міжусобныя канфлікты. Многія паўстанцкія групоўкі адмовіліся скласьці зброю, працягваюць супернічаць адна з адною ў барацьбе за ўладу, захопліваюць розныя рэгіёны краіны. У апошні год у Лібіі зьявіліся ўзброеныя замежныя ісламісты.
