Камандзір спэцпадразьдзяленьня АМАП МУС Таджыкістану заявіў аб далучэньні да тэрарыстычнай арганізацыі «Ісламская дзяржава».
Палкоўнік Гулмурод Халімаў напрыканцы красавіка зьнік з краіны.
Ягоны відэазварот апублікаваны ў сацыяльных сетках. На відэа, як мяркуецца, зробленым у Сырыі, Халімаў распавядае, што далучыўся да ісламістаў на знак пратэсту супраць палітыкі ўладаў.
У Таджыкістане, паводле яго словаў, забараняюць зьдзяйсьняць намаз і насіць мусульманскія строі. Зварот палкоўніка зроблены на расейскай мове. Халімаў сьцьвярджае, што разам зь ім у Сырыю адправіліся яшчэ дзесяць грамадзянаў Таджыкістану.
Халімаў ўзначаліў спэцпадразьдзяленьне МУС Таджыкістану тры гады таму. За ўзорнае выкананьне задач ён неаднаразова быў узнагароджаны ордэнамі і мэдалямі.
