Па выніках апошняга ў сэзоне біятлённага мас-старту ў расейскім Ханты-Мансійску Дар’я Домрачава заваявала галоўны прыз страляючых лыжнікаў — Вялікі крышталёвы глёбус.
Хоць на фініш беларуска прыйшла чацьвёртай, але яна на дзевяць пазыцый апярэдзіла сваю галоўную суперніцу — фінку Кайсу Макарайнэн.
Пытаньне — у каго нэрвы будуць мацнейшыя — захоўвалася літаральна да апошняга старта. Разрыў паміж канкурэнткамі быў неістотны і кожная асечка магла стаць вырашальнай. Але сёньня Макарайнэн надзвычай дрэнна страляла і, ня гледзячы на два штрафныя кругі Дамрачавай, адказала яшчэ горшай стралковай падрыхтоўкай.
Такім чынам, у калекцыі трохразовай алімпійскай чэмпіёнкі Дар’і Домрачавай зьявілася вяршыня, якая дагэтуль біятляністцы ніяк не скаралася — Вялікі крышталёвы глёбус.
