Украінская міліцыя ідэнтыфікавала асобу, якая ініцыявала пратэсты супраць вайскоўцаў у Канстанцінаўцы, — паведаміў намесьнік кіраўніка міліцыі Данецкай вобласьці Ільля Ківа.
Хваляваньні пачаліся пасьля таго, як у панядзелак днём ваенная машына зьбіла жанчыну з двума дзецьмі. У выніку загінула 8-гадовая дзяўчынка.
Пасьля гэтага ў сацсетках зьявіліся паведамленьні, што жыхары Канстанцінаўкі зладзілі акцыю пратэсту каля будынкаў, дзе жывуць вайскоўцы.
«Асоба, вінаватая ў пачатку беспарадкаў, ідэнтыфікаваная. Вядуцца апэратыўныя дзеяньні, у бліжэйшы час ён будзе затрыманы», — напісаў Ківа на сваёй старонцы ў «Фэйсбуку».
Ён таксама заклікаў мясцовых жыхароў не паддавацца на правакацыі сэпаратыстаў, якія, па яго словах, выкарыстоўваюць любую сытуацыю для дэстабілізацыі абстаноўкі.
Кіраўнік абласной міліцыі паведаміў аб затрыманьні двух вайскоўцаў.