Лінкі ўнівэрсальнага доступу

Гомельскаму праваабаронцу Леаніду Судаленку пагражаюць лёсам Нямцова


Леанід Судаленка

У Ірляндыі занепакоеныя бясьпекай гомельскага праваабаронцы і яго сям’і, а ў Беларусі — ня надта.

Гомельская міліцыя і пракуратура ня могуць знайсьці, хто пагражае гомельскаму праваабаронцу Леаніду Судаленку праз інтэрнэт.

Тым часам Міжнародны фонд абароны саміх праваабаронцаў — Front Line Defenders, заснаваны ў 2001 годзе ў ірляндзкім Дубліне, — занепакоіўся бясьпекай і недатыкальнасьцю гомельскага праваабаронцы Леаніда Судаленкі і ягоных дзяцей. На сайце гэтай міжнароднай арганізацыі зьмешчана гісторыя Судаленкі.

24 лютага 2015 году праваабаронца падаў заяву начальніку УУС Гомельскага аблвыканкаму з просьбай правесьці расьсьледаваньне ў зьвязку з артыкулам «Зорачкі для праваабаронцы», апублікаваным на сайце сумнеўнага паходжаньня. Судаленку ў артыкуле называюць «абаронцам забойцаў» — ён нібыта зарабляе грошы падачай «стратэгічных скаргаў» у Камітэт ААН па правах чалавека. Артыкул, падпісаны імем «Арцём Васільеў», заканчваецца пагрозай, што аднаму з сыноў Леаніда Судаленкі можа быць нанесена 101 нажавое раненьне.

Пагрозы й абразы пасыпаліся пасьля таго, як Судаленка стаў аказваць прававую і юрыдычную дапамогу Вользе Груновай, маці расстралянага Аляксандра Грунова, які ўчыніў жорсткае забойства гомельскай студэнткі. Маці хоча ведаць, дзе пахаваны сын, і дамагаецца зьмены ў заканадаўстве — каб целы расстраляных праз вырак суду можна было забіраць і хаваць там, дзе жадаюць сваякі.

На ўсе звароты Судаленкі ў праваахоўныя органы ён атрымаў адказы, што знайсьці вінаватых яны ня могуць.

У заяве на імя начальніка УУС Гомельскага аблвыканкаму Леанід Судаленка папрасіў вызначыць IP-адрас, зь якога ажыцьцяўляецца адміністраваньне сайта, і распачаць крымінальную справу паводле артыкула 186 Крымінальнага кодэксу Рэспублікі Беларусь («пагроза забойствам»).

У гэтым праваабаронцу адмовілі. Судаленка зьвярнуўся са скаргай у пракуратуру Гомеля і Генэральную пракуратуру. Бо 1 сакавіка праваабаронцу зноў пагражалі забойствам, даслаўшы электронны ліст. У ім зьмешчана спасылка на відэа пра забойства расейскага палітыка Барыса Нямцова, застрэленага ў Маскве 27 лютага 2015 году. Яна суправаджалася пытаньнем: «Ці падабаецца табе відэа?» Электронны ліст быў дасланы з адрасу, зарэгістраванага на імя пяцігадовага сына праваабаронцы.

На ўсе звароты Судаленкі ў праваахоўныя органы ён атрымаў адказы, што знайсьці вінаватых яны ня могуць.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG