Прэзыдэнт Францыі Франсуа Алянд заявіў, што яго краіна накіроўвае авіяносец для таго, каб прадстаўляць інтэнсіўную падтрымку баявым апэрацыям у Іраку супраць ісламісцкай групоўкі «Ісламская дзяржава».
Выступаючы на борце гэтага авіяносца «Шарль дэ Голь» на паўднёвым узьбярэжжы Францыі, Алянд заявіў, што карабель будзе дзейнічаць у шчыльным супрацоўніцтве зь міжнароднай кааліцыяй пад кіраўніцтвам ЗША, якая змагаецца супраць гэтай групоўкі ў Іраку і Сірыі.
Францыя ўжо ўдзельнічае ў дзеяньнях гэтай кааліцыі — яе авіяцыя наносіць паветраныя ўдары па пазыцыях ісламістаў. Гэтыя авіяўдары ажыцьцяўляюць 15 францускіх самалётаў, якія базуюцца ў Аб’яднаных Арабскіх Эміратах і Ярданіі. Але, як сказаў Алянд, становішча, якое склалася пасьля тэрарыстычных нападаў ісламістаў у Парыжы на мінулым тыдні, падчас якіх загінулі 17 чалавек, апраўдвае ўдзел у апэрацыі таксама і авіяносца.
Учора парлямэнт Францыі значнай большасьцю галасоў ухваліў працяг удзелу краіны ў міжнароднай апэрацыі супраць ісламістаў.
Групоўка «Ісламская дзяржава» ўхваліла тэракты ў Парыжы. Адказнасьць за напад на рэдакцыю францускага сатырычнага штотыднёвіка Charlie Hebdo ўзяла на сябе іншая экстрэмісцкая групоўка «Аль-Каіда Аравійскай паўвыспы», якая базуецца ў Емэне.