На ўсходзе Ўкраіны сілавыя структуры паведамляюць пра «істотнае» ўскладненьне сытуацыі на Данецкім кірунку.
УНІАН са спасылкай на прэс-цэнтар апэрацыі супраць сэпаратыстаў перадае, што ў нядзелю пазыцыі ўкраінскіх ваенных абстрэльвалі больш за 20 разоў. Паведамляецца, што спачатку сэпаратысты 6 разоў абстралялі са стралковай зброі, гранатамётаў і мінамётаў аддзелы, якія ўтрымліваюць пазыцыі паблізу Мар’інкі. Пасьля пад абстрэл патрапілі вайскоўцы ў аэрапорце Данецка і пасёлку Пяскі. Таксама вагонь вёўся паблізу населеных пунктаў Краснагораўка, Вопытнае і Паўночнае.
Сэпаратысты з самаабвешчанай Данецкай народнай рэспублікі (ДНР) таксама заяўляюць аб абстрэлах сваіх пазыцыяў у нядзелю больш за 20 разоў. «Інтэрфакс» прыводзіць дадзеныя так званага міністэрства абароны ДНР аб тым, што вайскоўцы 4 студзеня вялі вагонь па Куйбышаўскім, Кіеўскім і Пятроўскім раёнах Данецку.
У нядзелю ж стала вядома, што Арганізацыя па бясьпецы і супрацоўніцтве ў Эўропе (АБСЭ) плянуе падвоіць да 500 чалавек колькасьць сваіх назіральнікаў на ўсходзе Ўкраіны да канца студзеня. Пра гэта ў інтэрвію агенцтву DPA заявіў прадстаўнік АБСЭ Майкл Бацюркіў.
