Тысячы чалавек са сьцягамі і паходнямі перакрылі цэнтральныя вуліцы сталіцы Ўкраіны, паведамляе kp.ua.
1 студзеня ў 18:00 у Кіеве (19:00 па Менску) пачалося шэсьце з паходнямі, прысьвечанае 106-годзьдзю Сьцяпана Бандэры. Спачатку ў парку Шаўчэнкі сабралася каля 2000 чалавек, потым, па самых прыблізных падліках, да іх далучыліся яшчэ пара тысяч актывістаў.
У асноўным гэта — «свабодаўцы» і ўдзельнікі «Правага сэктару».
Але ў натоўпе бачныя і маленькія дзеці, і пэнсіянэры. У руках у людзей — чырвона-чорныя сьцягі і запаленыя паходні.
Наперадзе калёны едзе мікрааўтобус з узмацняльнікамі. Адтуль раздаюцца нацыяналістычныя лёзунгі. «Правы сэктар» нясе велізарны чорна-чырвоны банэр з партрэтам Бандэры. Натоўп перакрыў цэнтар Кіева — спачатку бульвар Шаўчэнкі, потым Бесарабскую плошчу і Хрэшчацік.
«Алігархаў на нажы, камуняку — на гіляку», — скандуюць мітынгоўцы і па дарозе прапануюць далучыцца да шэсьця.
Традыцыйнае шэсьце пройдзе па цэнтральных вуліцах Кіева. А скончыцца марш, хутчэй за ўсё, на Міхайлаўскай плошчы. Ахоўваюць праход каля 300 міліцыянтаў і байцоў Нацыянальнай гвардыі.
