Намесьніца старшыні суду Ларыса Назарэнка прызнала Ляўчука вінаватым ды прызначыла штраф у 40 базавых велічыняў — 6 мільёнаў рублёў.
Падчас паседжаньня судзьдзя выдаліла з залі двух журналістаў і забараніла фота, відэа і аўдыёзапіс.
Ляўчук прадставіў суду дакумэнты, што зьяўляецца карэспандэнтам агенцтва БелаПАН, але суд гэта да ўвагі не прыняў, Алеся зьвінавацілі ў працы на тэлеканал Белсат. Пасьля гэтага журналіст адмовіўся даваць тлумачэньні суду.
«Ёй было абсалютна ўсё роўна, яна была апошні вінцік у гэтай сыстэме, там ужо было падрыхтаванае рашэньне і сэнсу ніякага ў гэтым усім не было. Сфабрыкавана усё», — распавядае Алесь Ляўчук.
Суд даводзіў, што Алесь Ляўчук зьяўляецца аўтарам апытаньня на вуліцы Савецкай у Берасьці, якое потым было апублікавана на тэлеканале «Белсат». Нават знайшоўся сьведка-таксіст, які нібыта бачыў Алеся падчас працы над сюжэтам.
Спадар Ляўчук кажа, што шмат высокіх начальнікаў з праваахоўных органаў Берасьця ўдзельнічалі ў тым, каб прыцягнуць яго да адказнасьці ў судзе:
«Гэта працавала наступным чынам. Начальнік упраўленьня КДБ палкоўнік Язерскі загадаў свайму падначаленаму Якушыку. Той накіраваў ліст начальніку УУС Берасьцейскага аблвыканкаму генэрал-маёру Балейку, далей гэты ліст быў скінуты на кіраўнікоў Маскоўскага раёну Старыкевіча і начальніка Ленінскага РАУС Вайтовіча. Яшчэ падпісаў начальнік міліцыі бясьпекі Мельнікаў. І вось гэтыя, палічыце колькі чалавек, давалі загад, каб справа пайшла далей...»
Алесь Ляўчук кажа, што плянуе абскардзіць рашэньне ў абласным судзе, хаця бачыць у гэтым мала сэнсу.