Лінкі ўнівэрсальнага доступу

Паўлу Левінаву — 25 базавых штрафу за фота на фоне графіці

абноўлена

Павал Левінаў
Павал Левінаў

У Чыгуначным райсудзе Віцебску завяршыўся апошні судовы працэс над удзельнікамі фатасэсіі «з клеткамі і птушкамі».

Сямёра чалавек, якія сфатаграфаваліся на фоне будынка з графіці — малюнкам клетак, зь якіх вырываецца на волю птушка з газэты, прызналі вінаватымі ў несанкцыянаваным пікетаваньні.

Судовы працэс над Паўлам Левінавым вяла судзьдзя Алена Цыганкова. Паводле яе рашэньня, Павал Левінаў мусіць выплаціць штраф у памеры 25 базавых адзінак — 3 мільёны 750 тысяч рублёў.

Сьведкаў на гэтым судзе, як і на ранейшых разьбіральніцтвах інцыдэнту з фатасэсіяй, не было. Супраць Паўла Левінава сьведчыў супрацоўнік Чыгуначнага РАУС, маёр Аляксандар Рыбакоў, які склаў на ўдзельнікаў фатасэсіі пратаколы правапарушэньня за несанкцыянаванае пікетаваньне. Паводле ягоных словаў, усе ўдзельнікі фатасэсіі, якія сфатаграфаваліся на фоне графіці з такімі ж папяровымі клеткамі і птушкамі-арыгамі з газэт, каб працягнуць ідэю невядомага мастака, — без дазволу ўладаў выказвалі свае «асабістыя і грамадзкія інтарэсы».

Маёр міліцыі не хавае, што справы супраць семярых жыхароў Віцебску былі распачатыя з ініцыятывы начальніка аддзела аховы правапарадку і прафіляктыкі абласной міліцэйскай управы Аляксандра Каліноўскага. Ён даў загад, каб Чыгуначны РАУС «разабраўся» з журналістамі і актывістамі, якія сфатаграфаваліся ў грамадзкім месцы. Бо потым гэтыя фатаздымкі трапілі ў інтэрнэт, што й стала для міліцыянтаў галоўнай прыкметай і доказам правапарушэньня.

Давесьці суду іншае меркаваньне Паўлу Левінаву не далі. Судзьдзя Алена Цыганкова не задаволіла ніводнага хадайніцтва праваабаронцы, у тым ліку пра перанос пасяджэньня на пазьнейшы час, бо сёньня ён прыйшоў у суд хворым. Дакумэнт з паліклінікі судзьдзя не прыняла, выклікаць хуткую мэдыцынскую дапамогу не пагадзілася. А наконт хадайніцтваў заявіла, што іх «занадта шмат», і зрабіла Паўлу Левінаву дзьве заўвагі — за тое, што ён нібыта сьвядома зацягвае працэс.

Судзьдзя Алена Цыганкова
Судзьдзя Алена Цыганкова

Спадарыня Цыганкова так сьпяшалася, што не дазволіла зрабіць нават дзьвюххвілінны перапынак — каб Павал Левінаў занёс скаргу старшыні суду ў суседні кабінэт. Скарга тычылася паводзінаў судзьдзі Алены Цыганковай, якая катэгарычна не задавальняе хадайніцтвы і не прымае адводаў сваёй кандыдатуры.

Адзіным хадайніцтвам, задаволеным судзьдзёй яшчэ ў першы дзень суду, 12 сьнежня, быў дазвол на відэаздымкі працэсу. Аднак Алена Цыганкова забараніла здымаць суд прысутным у залі, дазволіўшы гэта толькі падсуднаму. Таму Левінаву давялося выступаць з хадайніцтвамі і даваць паказаньні, трымаючы ў руках відэакамэру.

Павал Левінаў — відэаапэратар на ўласным працэсе
Павал Левінаў — відэаапэратар на ўласным працэсе

Адно з хадайніцтваў праваабаронцы было пра тое, каб далучыць да матэрыялаў справы фатаздымкі з інтэрнэту, дзе сам Павал Левінаў праводзіць аднаасобны пікет. Адбывалася гэта летась, таксама ў лістападзе, аднак пад увагу міліцыі чамусьці ня трапіла. На думку спадара Левінава, пільны інтарэс менавіта да фатасэсіі журналістаў і актывістаў — відавочны. Але чым ён выкліканы — засталося невядомым.

Маёр Аляксандар Рыбакоў толькі паўтараў усё сказанае на ранейшых працэсах: што гэта была не фатасэсія, а несанкцыянаванае пікетаваньне.

Маёр Аляксандар Рыбакоў, складальнік пратаколаў і адзіны сьведка
Маёр Аляксандар Рыбакоў, складальнік пратаколаў і адзіны сьведка

Суд Чыгуначнага раёну падтрымаў гэтую пазыцыю: судзьдзі Дзяніс Губанаў і Алена Цыганкова прызналі ўсіх удзельнікаў фатасэсіі правапарушальнікамі. Апроч Паўла Левінава, нібыта за ўдзел у несанкцыянаванай акцыі штрафы атрымалі журналісты Зьміцер Казакевіч, Алена Сьцяпанава, Кастусь Мардзьвінцаў (па 20 базавых велічыняў кожны), каардынатарка аргкамітэту па стварэньні партыі БХД Тацяна Севярынец (25 базавых велічыняў) і актывістка таго ж аргкамітэту Алена Шабуня (18 базавых велічыняў). Выпадковы мінак Пётар Бярлінаў, які далучыўся да фатасэсіі, быў асуджаны на трое сутак арышту.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG