Віцэ-прэзыдэнт ЗША Джозэф Байдэн прыбыў на чале амэрыканскай дэлегацыі ў Кіеў. Ён будзе знаходзіцца з афіцыйным візытам ва Ўкраіне 20-21 лістапада.
Паводле слоў амбасадара ЗША ва Ўкраіне Джэфры Паета, якога цытуе УНІАН, Байдэн падчас візыту мае намер абмеркаваць з уладамі Ўкраіны пытаньне правядзеньня рэформаў і барацьбы з карупцыяй.
"Яго ўвага будзе сфакусаваная на рашучым сыгнале аб працягу падтрымкі ЗША ўкраінскага народу, прэзыдэнту Парашэнку і ўкраінскаму ўраду",— сказаў Пает і адзначыў, што Байдэн мае намер многае сказаць па гэтых пытаньнях.
Таксама візыт віцэ-прэзыдэнта ЗША будзе прысьвечаны фактам парушэньня Расеяй тэрытарыяльнай цэласнасьці Ўкраіны.
Паводле дарадцы прэзыдэнта Ўкраіны Алега Махніцкага, падчас візыту Байдэн ўнясе канчатковую яснасьць у верагоднасьць паставак амэрыканскай зброі ва Ўкраіну ў выпадку поўнамаштабнага разгортваньня ваенных дзеяньняў на ўсходзе дзяржавы.