На спробы пацікавіцца сьцягам адказваюць: «Свабоду жыхарам Данбасу».
Незвычайных хлопцаў сустрэў актывіст Павал Вінаградаў. Вось што ён распавёў Радыё Свабода:
Павал Вінаградаў: «Ехалі з жонкай Сьветай дахаты, і бачу — хтосьці ідзе з імпэрскім расейскім сьцягам. Вырашыў пацікавіцца ў хлопцаў, зь якой нагоды.
Я да іх падышоў, спытаў, што за сьцяг. Яны адказалі: «Сьцяг Расейскай імпэрыі». Значыць, гэта не выпадкова і людзі ведаюць, што за сьцяг. Пытаюся: «А зь якой нагоды?» Яны мне адказваюць: «Сёньня сьвята, пачытайце ў інтэрнэце».
Я іх стаў фатаграфаваць, тады яны сталі ад мяне сыходзіць. Я ім кажу: «Вы за „русский мир“?» А мне ў адказ: «Свабоду жыхарам Данбасу!»
Павал Вінаградаў зьвяртае ўвагу, што хлопцы ішлі зь вялікім сьцягам абсалютна адкрыта і, найверагодней, вярталіся зь нейкага мерапрыемства.
Як паведамляе дзяржаўнае агенцтва БЕЛТА, 19 лістапада ў Беларусі адзначаецца Дзень ракетных войскаў і артылерыі.