Воіслаў Шэшаль, кіраўнік ультранацыяналістычнай Сэрбскай радыкальнай партыі, заявіў, што Сэрбія патрабуе новай эканамічнай палітыкі і саюзу з Расеяй, Беларусьсю і Казахстанам.
Шэшаль, абвінавачаны ў ваенных злачынствах Гааскім трыбуналам, выступіў 15 лістапада на мітынгу ў Бялградзе. Гааскі трыбунал выпусьціў Шэшаля з турмы на мінулым тыдні «з гуманітарных меркаваньняў». СМІ паведамляюць, што ў Шэшаля быў дыягнаставаны рак. За кратамі ён правёў больш як 11 гадоў.
Воіслаў Шэшаль на мітынгу ў Бялградзе абвінаваціў сваіх былых партыйных калегаў — цяперашніх прэзыдэнта Томіслава Нікаліча і прэм’ер-міністра Аляксандра Вучыча — у «здрадзе Сэрбіі» і заявіў, што надышоў час, каб абодва палітыкі адказалі за гэта перад народам.
«Я ня бачу ніякай магчымасьці, каб Шэшаль мог вярнуцца на сэрбскую палітычную сцэну, — сказала Гордана Кнезевіч, дырэктарка паўднёваславянскай службы Радыё Свабода. — Пакуль што ўсё гэта выглядае для мяне як вялікае відовішча. Але ягонае вяртаньне з Гаагі — вельмі нявыгаднае для Нікаліча і Вучыча. Ён лічыць іх здраднікамі і хоча, каб Сэрбія цалкам зьвязалася з Расеяй».
Наколькі моцная ахвота сярод сэрбаў зьвязацца з Расеяй?
«Ідэя сэрбска-расейскай еднасьці зьяўляецца часткай ідэалёгіі рамантычнага нацыяналізму ў Сэрбіі. Цяжка сказаць, колькі людзей выступае за гэтую ідэю і наколькі яна папулярная ў грамадзтве, але фактам зьяўляецца і тое, што Пуціна нядаўна віталі ў Бялградзе як караля. І цягам апошняга тыдня Сэрбія праводзіла вайсковыя вучэньні супольна з Расеяй. Сэрбскіх журналістаў нават не дапусьцілі да месца, дзе адбываліся тыя вучэньні. Толькі расейскім журналістам была дадзена магчымасьць паведамляць пра іх», — адзначыла Гордана Кнезевіч.
Варта нагадаць, што канцлер Нямеччыны Ангела Мэркэль падчас сустрэчы «вялікай дваццаткі» ў Брысбэне ў Аўстраліі выказала асьцярогі з нагоды магчымага распаўсюду ўкраінскага канфлікту на іншыя краіны і згадала ў гэтым кантэксьце Сэрбію.
«Я кажу ня толькі пра самую Ўкраіну. Для мяне размова ідзе і пра Малдову, і пра Грузію, і калі так далей пойдзе, то трэба спытаць сябе, ці ня варта задумацца Сэрбіі і заходнебалканскім дзяржавам аб сваёй бясьпецы? Усё, што робіць Расея, ніяк не стасуецца з нашай сыстэмай каштоўнасьцяў. Палітыка Пуціна пасьля жаху двух сусьветных войнаў і пасьля канца халоднай вайны ставіць пад пытаньне ўвесь эўрапейскі мірны парадак», — заявіла Мэркель.
Апошнія парлямэнцкія выбары ў Сэрбіі адбыліся ў сакавіку сёлета. Выбары зь вялікай перавага выйграла Сэрбская прагрэсіўная партыя Аляксандра Вучыча, які абяцаў выбарцам інтэграцыю Сэрбіі з Эўразьвязам. Аднак пасьля выбараў першым афіцыйным візытам Вучыча стала паездка ў Маскву.
«Нешта здарылася паміж выбарамі і момантам, калі Вучыч заступіў на сваю пасаду. Расеі неяк удалося паўплываць на яго, але мы ня ведаем — як», — сказала Гордана Кнезевіч.