Алена Танкачова пракамэнтавала рашэньне ўладаў аб высылцы яе на тры гады зь Беларусі.
Алена Танкачова сказала карэспандэнту Свабоды, што рашэньне займае 5 старонак, і ў яе няма сумненьня, што яно было прынятае загадзя і ўсе тое, што адбывалася на працягу дня, — гэта была імітацыя працэсу. Паводле Танкачовай, не былі ўлічаныя ніякія хадайніцтвы ў яе падтрымку, а гэта 7 тысяч подпісаў.
Танкачова асабліва адзначыла фармулёўку наконт грамадзкай небясьпекі, якую, на думку праваахоўных органаў, яна ўяўляе:
«Аўтамабіль зьяўляецца сродкам павышанай небясьпекі і пад кіраваньнем Алены Танкачовай мог стаць прычынай сьмерці ці калецтваў чалавека».
Танкачова сказала, што ў кабінэце ёй далі зразумець: трохгадовы тэрмін забароны на вяртаньне ў Беларусь можа быць скарочаны да 1 году пры адпаведным звароце зь яе боку.
Алена Танкачова сказала, што будзе абскарджваць рашэньне.
