У сумесным паведамленьні «ўрадавых прэс-службаў ДНР і ЛНР» падкрэсьліваецца, што прыняцьце закону аб адмысловым статусе было абавязаньнем Кіева згодна зь менскім пратаколам ад 5 верасьня.
«Цяпер, пасьля аднабаковага рашэньня аб адмене гэтых законаў, менскі пратакол ад 5 верасьня фактычна перакрэсьлены...», — заяўляюць сэпаратысты і патрабуюць новай рэдакцыі пратаколу.
У паведамленьні адзначаецца, што бліжэйшымі днямі кіраўнікі ДНР і ЛНР «назавуць сваіх упаўнаважаных на менскіх перамовах». Пры гэтым сэпаратысты падкрэсьліваюць, што яны пацьвярджаюць свае афіцыйныя перамоўныя пазыцыі, абвешчаныя ў Менску 1 верасьня.
Учора Рада нацыянальнай бясьпекі і абароны Ўкраіны па рэкамэндацыі прэзыдэнта Пятра Парашэнкі пастанавіла ўнесьці ў Вярхоўную Раду законапраект аб адмене закону пра адмысловы статус асобных раёнаў Данбасу.
«У свой час гэты закон выканаў надзвычай важную ролю ў прыпыненьні зьнешняй інтэрвэнцыі, мабілізацыі падтрымкі сьветам менскіх мірных дамоўленасьцяў, пацьверджаньні шчырасьці намераў Украіны па дээскаляцыі сытуацыі ў Данбасе. Мы прадэманстравалі жыхарам Данецкай і Луганскай абласьцей і зьнешняму сьвету шчырае імкненьне Кіева да палітычнага ўрэгуляваньня. Такую магчымасьць баевікі адкінулі. Правядзеньне псэўдавыбараў тарпэдавала закон і рэзка абвастрыла сытуацыю ў Данбасе. Тыя шырокія паўнамоцтвы, якія прадугледжваў закон, мы гатовыя выдаваць толькі легітымна абраным органам мясцовага самакіраваньня. А не бандытам, якія самі сябе вянчаюць на царства», — падкрэсьліў Парашэнка.
