Як паведамілі ў пятніцу ўлады Нідэрляндаў, на гэтым тыдні былі вызначаныя асобы яшчэ 26-і загінулых, 19 зь якіх — нідэрляндзкія падданыя.
Выступаючы ў чацьвер на сэсіі Генэральнай Асамблеі ААН, прэм’ер-міністар Нідэрляндаў Марк Рутэ паабяцаў вярнуць родным парэшткі ўсіх ахвяраў авіякатастрофы і іх рэчы, а таксама заявіў, што ўсе вінаватыя ў трагедыі стануць перад судом.
Міжнародныя судова-мэдычныя экспэрты, групу якіх узначальваюць Нідэрлянды, у жніўні прыпынілі пошукавыя працы на месцы падзеньня самалёта з-за актывізацыі баявых дзеяньняў паміж сэпаратыстамі і ўкраінскімі вайскоўцамі ў гэтым раёне.
Матэрыялы першаснага расьсьледаваньня экспэртаў пацьвярджаюць вэрсію пра тое, што «Боінг-777» быў зьбіты зэнітнай ракетай.
Украіна і Захад абвінавачваюць у гэтым прарасейскіх сэпаратыстаў. Масква адхіляе ўсе абвінавачваньні і ўскладае адказнасьць за авіякатастрофу на Кіеў.
У выніку падзеньня малайзійскага лайнэра загінулі 298 чалавек, у тым ліку 193 падданых Нідэрляндаў.
