У Менскім абласным судзе пачаўся працэс над былым гендырэктарам кампаніі «Барысаўдрэў» Уладзімерам Мальцавым.
Мальцава абвінавачваюць паводле 424 артыкулу Крымінальнага кодэксу — злоўжываньне службовымі паўнамоцтвамі з нанясеньнем асабліва буйнога ўрону.
Паводле сьледзтва гэты ўрон склаў каля 18 мільярдаў рублёў.
Судзіць Мальцава судзьдзя Валянцін Вердыш, абараняе адвакат Дзьмітрый Гарачка.
На пытаньне, ці згодны Мальцаў з відэаздымкай падчас працэсу (пра гэта прасілі дзяржаўныя тэлеканалы), ён адказаў, што ў прынцыпе ня супраць, але мяркуе, што яны будуць скажаць факты і такім чыніць ціск на судзьдзю". Здымкі падчас працэсу забаранілі.
Мальцаў не прызнаў сябе вінаватым. Суд пастанавіў пачынаць судовае сьледзтва з допыту сьведак і перанёс паседжаньне на заўтра.
