Лінкі ўнівэрсальнага доступу

Хунта, Расея, Вашынгтон — берасьцейцы пра корань зла на Данбасе


Хто вінаваты ва ўзброеным канфлікце ў Данбасе? На такое пытаньне карэспандэнта Свабоды адказвалі сёньня жыхары Берасьця.

Наўпроставы лінк


Спадар сярэдняга веку: «Лічу, што вінаваты гэты часовы ўрад, які захапіў... Як кажуць, „хунта“, — цяпер моднае слова. Вядуць карныя апэрацыі замест таго, каб сесьці спакойна за стол перамоваў. Калі людзі хочуць аддзяліцца ці зрабіць фэдэрацыю сваю з сваіх абласьцей, то можна было б дамовіцца. Усё ж такі Данбас — гэта 70 працэнтаў эканомікі Ўкраіны».

Маладая дзяўчына: «Расея вінаватая. Яна пастаўляе ва Ўкраіну зброю, салдат. Каб не пастаўляла, то не было б ужо даўно вайны. Гэтых сэпаратыстаў ужо даўно разагналі б. Колькі Расея туды яшчэ будзе пастаўляць, столькі яшчэ будзе вайна. Я думаю, што яны там надоўга — хочуць аддзерці кавалак Украіны».

Пэнсіянэр: «Сачу я за падзеямі даўно, з часоў Майдану. І радаваўся за Ўкраіну, што вось, будуць жыць яны дэмакратычна, па-эўрапейску. Але тут гэта не па зубах расейскаму імпэрыялізму. Дыктатар Пуцін са сваёй ваеншчынай... Ён жа сваіх дзяцей не адпраўляе туды».

Спадарыня сярэдняга веку: «Вашынгтон вінаваты, хто ж вінаваты... Яны свае войскі там, у Крыме, ставяць караблі свае. Можа, яны свае войскі хочуць паставіць дзе-небудзь на Данбасе. Ну, ня ведаю, Украіна, можа, хоча ў НАТО. Мне падаецца, што там больш бок ЗША вінаваты ў гэтым усім, а не Расея».

Спадарыня сярэдняга веку: «Расея правакуе розныя ваенныя канфлікты ў розных кутках сьвету. І тут чамусьці яны палічылі, што „Крым наш“, што „Наваросія наша“, што і Ўкраіны наогул раней ня было. Гэта такая імпэрская палітыка, калі Пуціну хочацца адрадзіць Савецкі Саюз».

Спадар сярэдняга веку: «Расея, канечне. Яна ўводзіць войскі. Вы самі ведаеце, усё-ткі ці ваяваць з аўтаматам, ці ваяваць зь цяжкім узбраеньнем (маю на ўвазе танкі, гарматы) — гэта зусім іншая справа. Сэпаратысты б доўга ня вытрымалі гэтага. Але пры падтрымцы фінансамі, людзьмі (ваююць рэгулярныя часткі) Расеі... Вось за кошт чаго там застаецца напружанасьць».

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG