Вярхоўны суд Беларусі прызнаў былога намесьніка старшыні суду Савецкага раёну Гомеля Юрыя Жорава вінаватым у атрыманьні хабару і падрыхтоўцы да злачынства.
Ён атрымаў 14 гадоў пазбаўленьня волі з адбываньнем пакараньня ў папраўчай калёніі ўзмоцненага рэжыму, канфіскацыяй усёй маёмасьці, пазбаўленьнем права займаць пасады ў праваахоўных органах і судах тэрмінам на 5 гадоў.
Але ў зьвязку з амністыяй суд скараціў тэрмін пакараньня да 13 гадоў.
Акрамя таго, суд пастанавіў спагнаць з хабарніка ў даход дзяржавы больш як 11 млн рублёў.
Прысуд не падлягае абскарджваньню і апратэставаньню.
Як паведаміла карэспандэнту Свабоды прэс-сакратар Вярхоўнага суду Юлія Ляскова, па гэтай справе былі затрыманыя двое іншых абвінавачаных — індывідуальны прадпрымальнік па аказаньні юрыдычных паслуг і звычайны індывідуальны прадпрымальнік. У сувязі з тым, што яны пакутавалі ад аварыі на ЧАЭС, крымінальная вытворчасьць супраць іх спыненая, яны вызвалены ад крымінальнай адказнасьці.
У чэрвені кіраўнік Беларусі Аляксандар Лукашэнка папярэдзіў старшыню Гомельскага аблвыканкаму Ўладзімера Дворніка «аб няпоўнай службовай адпаведнасьці». Прычынай стала «патураньне, дапушчаныя недахопы і пралікі ў кадравай працы, непрыняцьце належных мер па выкананьні заканадаўства аб дзяржаўнай службе і барацьбе з карупцыяй».
Раней у Гомелі арыштавалі Віктара Банчука — першага намесьніка і Віктара Трызну — намесьніка старшыні абласнога выканкаму. Абодвух абвінавачваюць у злоўжываньні ўладаю й службовымі паўнамоцтвамі. Іх арышту папярэднічалі прысуд былому старшыні гомельскага гарвыканкаму Віктару Піліпцу і пакараньне ягоных памагатых за махінацыі з кватэрамі. У гэтым жа чорным сьпісе — былы начальнік Гомельскай абласной управы КДБ Іван Ляскоўскі і тры ягоныя супрацоўнікі, якія, са словаў кіраўніка дзяржавы, «арганізавалі „заказную“ праверку камэрцыйнай структуры ў інтарэсах канкурэнтаў».
За краты трапілі, паквапіўшыся на хабар, намесьнік начальніка крымінальнай міліцыі аблвыканкаму палкоўнік Вячаслаў Іваненка і намесьнік старшыні суду Савецкага раёну Гомеля Юры Жораў.
У Гомелі ў ліпені ўсьлед за арыштам Юрыя Жорава страцілі пасады яшчэ паўдзясятка судзьдзяў. У тым ліку тыя, якія каралі апазыцыйных актывістаў штрафамі і арыштамі. Фармальна яны звольненыя па ўласным жаданьні.
