Трохбаковая кантактная група па ўрэгуляваньні на ўсходзе Ўкраіны вырашыла прыцягнуць да перамоваў экспэртаў для адпрацоўкі тэхнічных дэталяў пытаньняў, якія абмяркоўваюцца удзельнікамі, паведамляюць беларускія тэлеканалы.
Як чакаецца, сустрэча працягнецца ў пятніцу на ўзроўні экспэртаў. Ніякіх заяваў удзельнікі сустрэчы для журналістаў не рабілі.
Раней у чацьвер Інтэрфакс паведамляў са спасылкай на крыніцу ў кантактнай групе, што на 1 жніўня заплянаваная сустрэча прадстаўнікоў сэпаратыстаў з дэлегацыяй украінскага боку.
«Сустрэча прызначаная на пятніцу. Гэта ня будуць кансультацыі па мірным урэгуляваньні. Там мяркуецца абмеркаваць вельмі вузкае кола пытаньняў. Хутчэй, гэта можна назваць сустрэчай прадстаўнікоў самаабвешчаных рэспублік з украінскай бокам», — сказаў суразмоўца агенцтва. Ён паведаміў, што падчас сустрэчы плянуецца абмеркаваць два пытаньні. «Першае зь іх — абмен палоннымі, другое, хутчэй за ўсё, — арганізацыя бясьпекі экспэртаў, якія працуюць на месцы крушэньня малайзійскага «Боінга», — сказаў суразмоўца агенцтва.
Між тым, у Кіеве паведамляюць, што трохбаковая кантактная група ў Менску прыняла рашэньне, што маршрут, па якім міжнародныя экспэрты ў чацьвер дабраліся да месца крушэньня малайзійскага Боінга, будзе захоўвацца.
Паводле агенцтва Белта, прадстаўнікі так званай Данецкай народнай рэспублікі і ў чацьвер удзельнічалі ў перамовах з кантактнай групай у складзе Леаніда Кучмы ад Украіны, Міхаіла Зурабава ад Расеі і Хайдзі Тальявіні ад АБСЭ.
