У Азэрбайджане вядомым праваабаронцам Лэйле і Арыфу Юнусам прад’яўленыя абвінавачваньні ў здрадзе радзіме, ухіленьні ад падаткаў, махлярстве і вядзеньні незаконнага бізнэсу.
Паводле іх адваката Джавада Джавадава, які паведаміў пра абвінавачваньні журналістам, што сабраліся перад будынкам пракуратуры, з Арыфа Юнуса ўзятая падпіска аб нявыезьдзе, а Лэйла Юнус можа апынуцца пад арыштам паводле рашэньня Насімінскага раённага суду гораду Баку. Муж і жонка Юнусы былі затрыманыя ў красавіку ў бакінскім аэрапорце, калі спрабавалі вылецець за мяжу.
Тады журналісты выказалі здагадку, што затрыманьне зьвязанае з крымінальнай справай супраць карэспандэнта газэты «Айна» — «Люстэрка» Раўфа Міркадырава, арыштаванага паводле абвінавачваньня ў шпіянажы на карысьць Армэніі.
Абвінавачваньні супраць яго тычацца ўдзелу ў сэмінарах і праектах па народнай дыпляматыі, якія арганізоўвала Лэйла Юнус разам з армянскай праваабаронцай Лаўрай Багдасаран.
