Прэзыдэнт Украіны Пётар Парашэнка заявіў, што пры пэўных умовах гатовы вярнуцца да рэжыму спыненьня агню. Пра гэта ён сказаў падчас тэлефоннай размовы зь віцэ-прэзыдэнтам ЗША Джозэфам Байдэнам, паведамляе прэс-служба кіраўніка дзяржавы.
Прэзыдэнт падкрэсьліў, што гатовы вярнуцца да рэжыму спыненьня агню, як толькі будзе пацьверджаньне аб яго захаваньні ў двухбаковым фармаце, а таксама пры вызваленьні ўсіх закладнікаў і ўстанаўленьня кантролю за мяжой пры маніторынгу АБСЭ.
Кіраўнік дзяржавы падкрэсьліў, што гатовы да пачатку канструктыўных палітычных перамоваў безь якіх-небудзь дадатковых умоваў.
У сваю чаргу Байдэн запэўніў, што ЗША падзяляюць і падтрымліваюць падыход прэзыдэнта Ўкраіны да ўрэгуляваньня сытуацыі.
Самаабвешчаная «Данецкая народная рэспубліка» («ДНР») таксама не пярэчыць супраць двухбаковага спыненьня агню, аднак ня верыць у мірныя намеры Парашэнкі. Пра гэта РІА Новості заявіў намесьнік так званага «міністра абароны» «ДНР» Фёдар Бярэзін.
Раней у чацьвер прэзыдэнт Францыі Франсуа Алянд і канцлер Нямеччыны Ангела Мэркель заклікалі прэзыдэнта Расеі Ўладзімера Пуціна пераканаць сэпаратыстаў на ўсходзе Ўкраіны пайсьці на перамовы з уладай для дасягненьня двухбаковага перамір’я.
У тэлефоннай размове з Пуціным эўрапейскія лідэры падкрэсьлілі неабходнасьць да 5 ліпеня правесьці пасяджэньне кантактнай групы з Кіеву, каб вызначыць умовы спыненьня агню ў зоне канфлікту, — у рамках дамоўленасьцей, дасягнутых у сераду ў Бэрліне кіраўнікамі МЗС Нямеччыны, Францыі, Украіны і Расеі.