Пасьля 30 сутак арышту і галадоўкі ў зьняволеньні гомельскі актывіст Юры Рубцоў шпіталізаваны.
У гомельскім герыятрычным шпіталі Гомеля яго наведаў карэспандэнт Свабоды.
Пасьля падвойнага арышту ў Менску і Гомелі і 30 сутак галадоўкі 52-гадовы гомельскі грамадзкі актывіст Юры Рубцоў, якога неаднаразова перасьледавалі за тое, што ён прыходзіў на акцыі апазыцыі ў майцы з надпісам «Лукашэнка, сыходзь!», апынуўся ў шпіталі у рабочым пасёлку Касьцюкоўка ля Гомеля.
У шпітальнай палаце Юры Рубцоў заявіў карэспандэнту Свабоды:
«Са мною адбылося тое, што магло адбыцца зь любым грамадзянінам Рэспублікі Беларусь, які не спадабаўся таму ці іншаму міліцэйскаму начальніку. Патрапіўшы ў міліцыю, ён зьнікае — ні родным не паведамляюць, ні адвакату. Ёсьць парушэньне правоў чалавека у поўным сэнсе гэтага слова. Ніводзін грамадзянін Беларусі ад гэтага не застрахаваны».
Поўны тэкст інтэрвію з Юрыем Рубцовым, а таксама відэа — пазьней на нашым сайце.
Жонка Юрыя Рубцова Ядвіга ўчора распавяла карэспандэнту «Свабоды», што яе муж страціў за час галадоўкі 39 кіляграмаў.
«Ён ня еў цягам 30 дзён, чалавек памірае. У яго язвы. Калі чалавек выходзіць з канцлягера, вось так ён выглядае. Цяпер ён у шпіталі, яму хуткую выклікалі, як толькі мы яго знайшлі».
Сам спадар Рубцоў, кажа, што страціў меней, чым 39 кіляграм, але колькі ня ведае, бо дагэтуль яшчэ ня ўзважваўся.
Юрыя Рубцова выводяць з суду
Уначы 27 траўня Рубцова вызвалілі з гомельскага ізалятара часовага ўтрыманьня.
22 траўня суд Чыгуначнага раёну Гомеля пакараў яго пяцьцю суткамі адміністрацыйнага арышту, які дагэтуль адбыў у Менску 25 сутак арышту.
Паводле Рубцова, у апошні дзень адбыцьця пакараньня ў менскай турме на Акрэсьціна яго наведаў сьледчы і ў прысутнасьці адваката апытаў у сувязі з абразай судзьдзі суду Савецкага раёну Менску Кірыла Палулеха. 21 траўня, за некалькі гадзін да вызваленьня, яго прывезьлі на мікрааўтобусе з турмы ў пастарунак чыгуначнага вакзалу. У пастарунку ад яго патрабавалі падпісаць паперы, што ў яго няма прэтэнзіяў па канфіскаванай майцы. Актывіст падпісваць катэгарычна адмовіўся, і яго адпусьцілі.
Юры Рубцоў прыехаў цягніком у Гомель, і там яго затрымалі два супрацоўнікі АМАПу нібыта за непадпарадкаваньне і нецэнзурную лаянку. Пасьля складаньня пратаколаў «чалавека-майку» адвезьлі ў ізалятар, а потым у суд.
На знак пратэсту супраць міліцэйскага і судовага самаўпраўства «чалавек-майка» Юры Рубцоў абвясьціў галадоўку ў Гомельскім ізалятары часовага ўтрыманьня.
