Нацыянальны экзіт-пол: Парашэнка перамагае ў першым туры (ЖЫВЫ БЛОГ)

Юлія Цімашэнка прагаласавала ў Днепрапятроўску

Кандыдат на прэзыдэнта Ўкраіны Юлія Цімашэнка прагаласавала ў родным Днепрапятроўску.

Пасьля галасаваньня яна заявіла, што Ўкраіне, каб забясьпечыць сваю бясьпеку патрэбна бліжэйшым часам правесьці рэфэрэндум аб далучэньні да НАТО.

Патрыярх Філарэт хоча прэзыдэнта ў першым туры

Прадстаяцель УПЦ патрыярх Філярэт адным зь першых прагаласаваў на выбарах прэзыдэнта Ўкраіны.

Ён выказаў спадзеў, што ўкраінцы выберуць сабе прэзыдэнта ў першым туры, перадае тэлеканал «1+1».

Стэфан Эрыксан назірае за выбарамі ў Адэсе

Былы амбасадар Швэцыі ў Беларусі Стэфан Эрыксан накіраваны ў якасьці міжнароднага назіральніка ў Адэсу.

Ён засьведчыў, што выбары ў горадзе пачаліся, але ад камэнтароў для Свабоды ветліва адмовіўся.

На Данеччыне баевікі нападаюць на выбарчыя ўчасткі

Прадстаўнікі «Данецкай народнай рэспублікі», якую Генпракуратура Ўкраіны прызнала тэрарыстычнай арганізацыяй, блякуюць працу ўчастковых камісій у дзень выбараў.

У Данецкай вобласьці адкрыліся 308 выбарчых участкаў з 2430

Як паведамляе прэсавая служба Данецкай абласной адміністрацыі, «па стане на 8.45 галасаваньне пачалося на 308 участках з 2430. Аднак збор інфармацыі яшчэ працягваецца».

Яцанюк: «Першы візыт новага прэзыдэнта — у Брусэль»

Чарнігаў: голас кожнага — вырашальны

Пра ўпадабаньні ўкраінскіх выбарцаў рэпартаж з Чарнігава карэспандэнта Свабоды.

У Херсоне выбаркам закідалі «кактэйлямі Молатава»

Невядомыя 25 траўня каля 0:15 закідалі «кактэйлямі Молатава» выбарчы ўчастак у Херсоне, паведамляе Украінская праўда.

Міліцыя апэратыўна пагасіла пажар. З самай раніцы працаўнікі школы ліквідуюць наступствы. Зрабілі касмэтычны рамонт. Інцыдэнт не паўплывае на правядзеньне выбараў.

Затрыманых ва Ўкраіне расейскіх журналістаў Lifenews вызвалілі

Выбарчыя ўчасткі ў Данецку і Горлаўцы зачыненыя

Як паведамляе сайт Новости Донбасса, па стану на 8 гадзін выбарчыя ўчасткі ў Данецку і Горлаўцы не адчыніліся. Ці тычыцца гэта ўсіх участкаў — не паведамляецца.

Жыхары Крыма будуць галасаваць у Херсонскай і Мікалаеўскай абласьцях

Жыхары акупаванага Расеяй Крыма ня змогуць прагаласаваць на выбарах прэзыдэнта ў сябе дома.

Улады Украіны надалі ім магчымасьць прагаласаваць на бліжэйшых да іх участках у суседніх абласьцях — Херсонскай і Мікалаеўскай.

6 тысяч жыхароў Крыма дзеля гэтага ўжо зрабілі адпаведную рэгістрацыю.

У Марыюпалі 13 выбарчых участкаў не адкрыліся

У 8 гадзін не ўсе выбарчыя ўчасткі Марыюпаля адкрыліся. У 59 пакуль не пачалі працу 10 участковых камісій — ім проста ня выдалі бюлетэні.

У 58 выбарчай акрузе не працуюць 3 участковыя камісіі. Прычына — з-за недахопу людзей там камісіі не сфармаваныя, паведамляе мясцовы сайт.

Паведамленьні аб узломе сыстэмаў ЦВК Украіны — фальшыўка

Выбарчыя ўчасткі адчыніліся

Выбарчыя ўчасткі будуць працаваць з 8.00 да 20.00.

Амаль 80 % выбаршчыкаў гатовыя прыняць удзел у галасаваньні 25 траўня. Такія вынікі агульнанацыянальнага апытаньня, праведзенага фондам «Дэмакратычныя ініцыятывы імя Ілька Кучарыва» сумесна з цэнтрам імя Разумкова з 14 па 18 траўня.

За мяжой на выбарах прэзыдэнта Ўкраіны будуць галасаваць 400 тысяч украінцаў.

Вайскоўцы ўзброеных сіл Украіны прагаласуюць на звычайных участках, а для міратворцаў створаны дадатковыя замежныя ўчасткі для галасаваньня.

У Камітэце выбаршчыкаў Украіны прагназуюць, што ў дзень галасаваньня могуць не адкрыцца каля 5% выбарчых участкаў, калі сытуацыя на ўсходзе Ўкраіны ня зьменіцца.