Вайна ў Кіеве. Дзень другі

Дэсантнікаў вязуць у Кіеў — Грыцэнка

Экс-міністар унутраных спраў Украіны Анатоль Грыцэнка паведаміўу Фэйсбуку, што міністар абароны Павел Лебедзеў аддаў загад адправіць на Кіеў з Днепрапятроўска 25-ю асобную Днепрапятроўскую паветрана-дэсантную брыгаду.

Раней Павел Лебедзеў заяўляў, што «армія можа ўдзельнічаць ва ўрэгуляваньні сытуацыі ў краіне толькі пасьля ўвядзеньня надзвычайнага або ваеннага становішча».

Афіцыйнага пацьвярджэньня інфармацыі Грыцэнкі няма.

Арбузаў абвінаваціў апазыцыю


Выконваючы абавязкі прэм’ер-міністра Ўкраіны Сяргей Арбузаў абвінаваціў «радыкальна настроеныя сілы» ў крывавым разьвіцьця падзей, паведамляе 5 канал. Паводле яго слоў, пратэстоўцы «ганьбяць краіну».

У пачатку пасяджэньня Кабінэта міністраў ён рэкамендаваў кіраўніцтву кампаній , разьмешчаных у эпіцэнтры падзей, дазволіць жанчынам не хадзіць на працу некаторы час, пакуль сытуацыя не нармалізуецца.

Усе дзяржаўныя ўстановы Арбузаў заклікаў з разуменьнем паставіцца да таго, што многія людзі ў Кіеве не змаглі своечасова трапіць на працу з-за спыненьня мэтрапалітэна. І папрасіў грамадзян іншых гарадоў і рэгіёнаў з разуменьнем паставіцца да таго, што абмежаваныя магчымасьці ўезду ў Кіеў.

Майдан просіць прыносіць ежу, паліва і здаваць кроў

Штаб нацыянальнага супраціву ў Кіеве зьвярнуўся з заклікам да кіяўлян прыносіць ежу і паліва для генэратараў і здаваць кроў для пацярпелых актывістаў.

Таксама ў супольнасьці Эўрамайдан-SOS просяць здаваць кроў для пацярпелых, паведамляе «Українська правда».

Паўстанцы ў Львоўскай вобласьці бяруць уладу ў свае рукі

«Большасьць раённых аддзелаў міліцыі на Львоўшчыне ўжо абвясьцілі пра пераход на бок украінскага народа і падпарадкаваньне выканаўчаму камітэту Львоўскай абласной рады — Народнай радзе», — гаворыцца ў заяве, апублікаванай на афіцыйным сайце Львоўскай абласной рады.

Міністар Павал Лебедзеў пацьвердзіў адпраўку 25-й брыгады дэсантнікаў з Днепрапятроўска ў Кіеў.

Праваахоўнікі зноў ўключылі вадамёты

На Майдане Незалежнасьці праваахоўнікі аднавілі актыўны наступ. Як заявілі са сцэны Майдана, яны ўключылі вадамёты і спрабуюць адцясьніць людзей.

Першая старонка Guardian

Guardian front page, Wednesday 19 February 2014 – Kiev crackdown: 18 dead as protest camp burns pic.twitter.com/UdURWKWtFG

— Guardian news (@guardiannews) 19 февраля 2014

Прэм’ер Дональд Туск: Польшча будзе настойваць на санкцыях

Польшча будзе настойваць на ўвядзеньні санкцыяў Эўразьвязу супраць украінскіх уладаў — паведаміў, выступаючы ў Сэйме, прэм’ер Польшчы Дональд Туск.

20 лютага ва Ўкраіне абвешчаная жалоба

На Майдане 10 тысяч мітынгоўцаў, 5 тысяч сілавікоў

На кіеўскім майдане Незалежнасьці знаходзяцца каля 10 тысяч мітынгоўцаў і каля 5 тысяч байцоў Унутраных войскаў МУС і спэцпадразьдзяленьня міліцыі «Беркут», перадае УНІАН.

Палова майдана Незалежнасьці застаецца выпаленай, а таксама ўсё спалена вакол Дома прафсаюзаў, які напалову вы́гараў.

Мітынгоўцы засяродзіліся ў асноўным каля сцэны Майдана, зь якой гучаць заклікі да ўсіх запісвацца ў самаабарону.

Дэманстрантаў адціснулі да ўзроўню праезнай часткі Храшчаціку. Між мітынгоўцамі і праваахоўнымі органамі — буфэрная зона ў 100 мэтраў. З боку Унутраных войскаў бесьперапынна працуюць пажарныя гідранты, якія гасяць падпаленыя барыкады. Гучаць спарадычныя выбухі гранат.

Паблізу стаяць 15 карэт хуткай дапамогі, 2 пажарныя машыны і каля дзесяці машын рознай спэцтэхнікі.

Папа Францішак заклікаў да міру ва Ўкраіне

Папа рымскі заклікаў варожыя бакі канфлікту ва Ўкраіне да стрымліваньня гвалту.

Пасьля сустрэчы з 200 тысячамі пілігрымаў папа заявіў, што ён зь непакоем у сэрцы назірае, што робіцца цяпер у Кіеве. Ён запэўніў украінскі народ у сваёй блізкасьці, і што ён моліцца за ахвяр, параненых і іх блізкіх, паведамляе агенцтва РАР.

Хто вінаваты ў ахвярах падчас сутычак у Кіеве, за што ідзе змаганьне? З такімі пытаньнямі наш карэспандэнт зьвяртаўся да гарадзенцаў.

З другой за дзень заявай пра падзеі ў Кіеве выступіў МЗС Расеі і назвало Майдан «карычневай рэвалюцыяй».

Бабіна: Галоўнае памкненьне ўкраінцаў — захаваць чалавечую годнасьць

Беларуская пісьменьніца ўкраінскага паходжаньня Наталка Бабіна: «Шчыра кажучы, я досыць даўно не была ва Ўкраіне і ня бачу гэтых падзеяў знутры. Але зразумела, як любы нармальны чалавек, як любы нармальны беларус я вельмі перажываю, вельмі спачуваю і ўсёй душой падтрымліваю ўкраінцаў у іх памкненьні да дэмакратычных каштоўнасьцяў, да таго, каб захаваць сваю нацыянальную годнасьць, чалавечую годнасьць. Але рабіць нейкія прагнозы — як і чым усё скончыцца — лічу, ня толькі няправільна, а проста непрыгожа. Асабліва нам, якія далёка, якія ня там, ня ў гушчы падзеяў».

Падпалкоўнік міліцыі Казлоў: «Нельга людзей заганяць у кут»

Падпалкоўнік міліцыі ў адстаўцы Мікалай Казлоў зь Менску мяркуе, што адказнасьць за ахвяры ў Кіеве, у тым ліку сярод міліцыянтаў, нясуць улады краіны, якія зрабілі падвойнае злачынства: спачатку падманулі народ з эўраінтэграцыяй і справакавалі грамадзян на масавы пратэст, а потым абралі сілавы варыянт вырашэньня канфлікту з Майданам па прыкладзе Беларусі.

Кіраўнікі МЗС Польшчы, ФРГ і Францыі тэрмінова едуць у Кіеў

Як паведамляе Польскае радыё, міністар замежных спраў Польшчы Радаслаў Сікорскі ужо сёньня вылятае ў Кіеў. Разам зь ім едуць ягоныя калегі зь Нямеччыны і Францыі. Місія арганізаваная на просьбу кіраўніцы зьнешняй палітыкі Эўразьвязу Кэтрын Эштан. Аднак тэрмін візыту яшчэ ўлакладняецца.

Пратэстоўцы захапілі будынак кіеўскага паштамта і дзяржтэлерадыё

Там будзе арганізаваная камэндатура, кухня і іншыя побытавыя памяшканьні, паведамілі са сцэны Майдану.

Раней спэцназ выгнаў мітынгоўцаў з Кастрычніцкага палаца, Украінскага дома, а Дом прафсаюзаў, дзе быў іх штаб, згарэў.

Мечыслаў Грыб: «Гэта, безумоўна, масавыя забурэньні»

Мілаш Зэман можа скасаваць візыт Януковіча ў Чэхію