Лінкі ўнівэрсальнага доступу

Партыю БНФ не пускаюць у віцебскія навучальныя ўстановы


Старшыня абласной арганізацыі партыі БНФ Леанід Аўтухоў напісаў 54 заявы да адміністрацыяў ВНУ, тэхнікумаў, каледжаў, ліцэяў, гімназій і школ, каб прадстаўнікам партыі далі магчымасьць правесьці сустрэчы з пэдагогамі.

На ніводную з больш як паўсотні не прыйшло станоўчага адказу.

Некаторыя кіраўнікі ўвогуле праігнаравалі зварот старшыні абласной партыйнай структуры: з 9 навучальных установаў спадар Аўтухоў увогуле не атрымаў ніякага адказу. З гэтай нагоды ён зьвярнуўся ў раённыя адміністрацыі і пракуратуры з просьбай распачаць працэсуальныя дзеяньні, прадугледжаныя Працэсуальна-выканаўчым кодэксам аб адміністрацыйных правапарушэньнях, бо мае месца парушэньне заканадаўства аб зваротах грамадзянаў.

У Кастрычніцкім і Першамайскім раёнах ні чыноўнікі, ні пракуроры парушэньняў ня ўбачылі, а пратэрміноўкі з адказамі спадару Аўтухову патлумачылі збоямі ў працы пошты: то лісты ад апазыцыйнага актывіста не дайшлі да навучальных установаў, то наадварот — адказы «згубіліся» па дарозе да ягонай паштовай скрыні... Толькі адміністрацыя Чыгуначнага раёну прызнала факты парушэньняў заканадаўства з боку адміністрацыяў сярэдніх школаў № 9 і № 27, гімназіяў № 2 і № 4. Леаніду Аўтухову паведамілі, што вінаватыя службовыя асобы прыцягнутыя да дысцыплінарнай адказнасьці. Да адміністрацыйнай адказнасьці — за парушэньне заканадаўства — справа не дайшла.

Леанід Аўтухоў лічыць дысцыплінарнае пакараньне за такое парушэньне недастатковым:

«Я падаў заявы ва ўсе тры раённыя суды, каб адказных асобаў у адміністрацыях 9 навучальных установаў пакаралі сапраўдным чынам. Мы — зарэгістраваная партыя, былі напісаныя афіцыйныя звароты, што мы хацелі б сустрэцца з пэдагагічным калектывам, каб расказаць пра нашу дзейнасьць і пра нашы мэты. Прасілі знайсьці гадзіну-другую, каб мы мелі такую магчымасьць. Бо, на жаль, настаўнікі і выкладчыкі часта мала абазнаныя ў сучаснай палітыцы. Як высьветлілася, неабазнаныя яны і ў заканадаўстве. Дык тады няхай вучацца і адказваюць за свае парушэньні па ўсёй строгасьці закону».

Апазыцыянэр зьвяртае ўвагу і на тое, што ў адказах, атрыманых з 15-ці навучальных установаў, няма інфармацыі аб парадку іх абскарджваньня. Гэта таксама сьведчыць пра недастатковы ўзровень прававой і палітычнай адукаванасьці, лічыць актывіст.

Двое кіраўнікоў — дырэктар сярэдняй школы № 25 і рэктар Мэдычнага ўнівэрсытэту — на беларускамоўны допіс адказалі па-расейску. Значыць, прадэманстравалі ці то няведаньне беларускай мовы, ці то зьняважлівае стаўленьне да яе, лічыць Леанід Аўтухоў.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG