Лінкі ўнівэрсальнага доступу

Дэпартамэнт гісторыі ЭГУ перайшоў да Каўбаскі


Прарэктар па акадэмічных пытаньнях прафэсар Аляксандар Каўбаска прыняў на сябе кіраўніцтва дэпартамэнтам гісторыі ЭГУ да асобнага рашэньня кіраўнічай рады ўнівэрсытэту.

Пра гэта гаворыцца ў адмысловым загадзе, які падпісаў рэктар ЭГУ Аляксандар Міхайлаў.

Раней было прынятае рашэньне вызваліць з пасады кіраўніка дэпартамэнту гісторыі прафэсара Паўла Церашковіча, паўнамоцтвы якога на гэтай пасадзе спыняюцца 31 сакавіка. Пасяджэньне кіроўнай рады адбудзецца ў сярэдзіне красавіка.

Аляксандар Каўбаска сказаў,што не камэнтуе звальненьне Церашковіча, хоць «афіцыйнае тлумачэньне Павал Усеваладавіч атрымаў».

Ці азначае гэтае кадравае рашэньне, што ў акадэмічным дэпартамэнце гісторыі адбудуцца нейкія зьмены адносна выкладаньня гісторыі Беларусі ці выкладаньня на беларускай мове?

«Я магу сказаць пра свае курсы, якія я выкладаю на беларускай мове ўжо гадоў 20 і ў менскім ЭГУ, і ў віленскім ЭГУ. І ніякая зьмена кіраўніцтва на гэта не ўплывала. Мне даручана пераймаць апэратыўнае кіраўніцтва да асобнага рашэньня кіроўнай рады. Ніякіх зьменаў у тым, што было ў дэпартамэнце, у гэты час не прадбачыцца. А ў будучым мы з вамі сустрэнемся і пра будучае будзем гаварыць асобна», — адзначыў спадар Каўбаска ў размове з карэспандэнтам Свабоды.

Павал Церашковіч сказаў, што камэнтаваць кадравыя рашэньні адносна дэпартамэнту гісторыі зможа толькі пасьля пасяджэньня кіроўнай рады.

Прафэсар Павал Церашковіч звольнены з пасады кіраўніка дэпартамэнту гісторыі Эўрапейскага гуманітарнага ўнівэрсытэту. Ён застаецца кіраўніком сэнату, дасьледчага цэнтру і выкладчыкам унівэрсытэту.
XS
SM
MD
LG