Лінкі ўнівэрсальнага доступу

У Гомелі ўшанавалі памяць Цімоха Вострыкава і Палуты Бадуновай


Шлях да магілы Цімоха Вострыкава на могілках у вёсцы Раманавічы Гомельскага раёну

25 сакавіка, у Дзень Волі, актывісты дэмакратычных арганізацыяў Гомеля адкрылі памятную шыльду на магіле слыннага земляка Цімафея Вострыкава ў вёсцы Раманавічы.

На гранітнай дошцы высечана: «Змагару і Беларусу», пазначаны таксама даты нараджэньня й сьмерці: 28 жніўня 1922 году — 13 лістапада 2007 году.

Усталяваць беларускамоўную шыльду на магіле Вострыкава менавіта да 25 сакавіка вырашыла кааліцыя дэмакратычных арганізацыяў Гомельскай вобласьці.

У Гомелі ўшанавалі памяць Цімоха Вострыкава і Палуты Бадуновай
пачакайце

No media source currently available

0:00 0:02:35 0:00
Наўпроставы лінк

Рэгіянальны каардынатар стваранай партыі «Беларуская хрысьціянская дэмакратыя» Юры Клімовіч, чый бацька таксама быў рэпрэсаваны і зьведаў сталінскі ГУЛАГ, сказаў:

«Я ведаў Цімоха Акімавіча Вострыкава. Ён быў сябрам майго бацькі, сябрам нашай сям’і. Мяне асабліва ўразіла ў ім жыцьцесьцьвярджальнасьць. Нягледзячы на драматычныя павароты лёсу, цяжкае жыцьцё, ён ня ўпаў у дэпрэсію. Яму было ўжо больш за 50 гадоў, калі ён вярнуўся зь лягераў, дзе правёў чвэрць стагодзьдзя. І ён чарговы раз пачаў жыцьцё з нуля. Вострыкаў быў беззапаветна адданы Беларусі, справе беларускага нацыянальнага адраджэньня — і дзеля гэтага сьвядома пайшоў на пакуты».

Цімох Вострыкаў нарадзіўся 28 жніўня 1922 году ў вёсцы Баршчоўка Добрускага раёну. Да вайны скончыў курсы й накіраваны быў настаўнічаць на Берасьцейшчыну. Адтуль яго прызвалі ў Чырвоную Армію. У баях пад Смаленскам трапіў у акружэньне й палон. Зьведаў пакуты остарбайтэра і вучобу ў заходняй Нямеччыне ў гімназіі імя Янкі Купалы. Пасьля працаваў у Англіі, вучыўся ў Бэльгіі. І заставаўся беларусам.

У 1952 годзе Цімох Вострыкаў стаў удзельнікам «групы чатырох», якая пры спрыяньні амэрыканскай выведкі на парашутах была скінута ў Беларусь для арганізацыі нацыянальнага падпольля. Праз здрадніка група трапіла ў кіпцюры НКУС.

Гомельскія актывісты адзначалі, што Вострыкаў мог бязьбедна жыць на Захадзе, але выбраў пакутны шлях, бо верыў у лепшую долю і незалежнасьць Беларусі.

З могілак у Раманавічах грамадзкія актывісты выправіліся ў Навабеліцкі раён Гомеля, дзе ўсклалі жывыя кветкі проста на сьнег — на месцы дома, дзе жыла выбітная дзяячка Беларускай Народнай Рэспублікі Палута Бадунова. Гэтае месца ніяк не пазначана гарадзкімі ўладамі. Гарвыканкам адмовіўся нават пераназваць вуліцу імя баўгарскага камуніста Дзімітрава ў вуліцу імя Палуты Бадуновай, хоць за гэта падпісаліся сотні мясцовых жыхароў.
Жывыя кветкі на месцы дома Палуты Бадуновай
Жывыя кветкі на месцы дома Палуты Бадуновай
XS
SM
MD
LG