Лінкі ўнівэрсальнага доступу

Каліноўскі ў Горадні: Буду пісаць кнігу пра «Вясну»

абноўлена

Аўтар Валер Каліноўскі раздае аўтографы, 20 студзеня 2013 году
Аўтар Валер Каліноўскі раздае аўтографы, 20 студзеня 2013 году

У Горадні адбылася прэзэнтацыя кнігі «Справа Бяляцкага». Сабраліся больш за 40 чалавек. Выступілі аўтар кнігі Валер Каліноўскі, журналіст Андрэй Пачобут, праваабаронца Віктар Сазонаў ды іншыя.

На сустрэчу з аўтарам кнігі «Справа Бяляцкага» Валерам Каліноўскім ў Горадні сабралася больш за сорак чалавек. Ён сказаў гарадзенцам:

«Мы жадаем яму, каб ён хутчэй выйшаў на волю, гэта ненатуральная сытуацыя, калі чалавека за добрыя справы, за дапамогу ганімым, арыштаваным, пабітым, садзілі самога ў турму. Відаць, гэта было асноўнай мэтай маёй працы над кнігай, якая доўжылася год пасьля завяршэньня працэсу над Алесем, суровым прысудам, на фактах, дакумэнтах, сьведчаньнях давесьці, што Алесь Бяляцкі ня быў ні ў чым вінаваты, што працэс меў палітычны характар».

Аўтар кнігі раздаў прысутным лісты ад Алеся Бяляцкага, каб яны маглі зь імі пазнаёміцца.

Былы палітвязень журналіст Андрэй Пачобут зазначыў на прэзэнтацыі:

«Я думаю, што з 1996 году, калі ўтварылася „Вясна“, любы чалавек, які патрапіў пад перасьлед, зьвязаны з палітыкай, з журналістыкай, ён сутыкнуўся з гэтай арганізацыяй, зь дзейнасьцю Бяляцкага, я перш сутыкнуўся зь ёю як журналіст, таму што пісаў пра падзеі, пра рэпрэсіі, то Алесь заўсёды гатовы быў даць інфармацыю. А калі я сам патрапіў пад перасьлед, то „Вясна“ і тут гарадзенская „Вясна“, яны мне дапамагалі, інфармацыйна перш за ўсё, таму што прававая дапамога мне была гарантаваная рэдакцыяй, дзе я працую. І калі быў першы дзень майго працэсу, тады Алесь прыяжджаў. Мой працэс быў закрыты, нікога не пусьцілі. І ён быў адным з тых, хто стаяў пад судом. Мінула недзе паўгады, і я быў на яго судзе, прыехаў адмыслова ў Менск, каб быць на абвяшчэньні прысуду. Самае галоўнае, што чалавек пацярпеў за тое, што нёс дапамогу іншым, гэта самае галоўнае ў гэтай справе».

Валер Каліноўскі не выключае, што можа напісаць таксама кнігу пра саму праваабарончую арганізацыю:

«Вясна» — гэта ўнікальная арганізацыя, якая дзейнічае ў рэпрэсіўных умовах, без рэгістрацыі, пад ціскам, арыштамі, ператрусамі, пазбаўленая офісу, бяздомная, але дзейнічае і ніводзін чалавек не сышоў. Я думаю, варта з часам напісаць кнігу пра гэту ўнікальную арганізацыю, гэтых людзей».

Алесь Бяляцкі пісаў, сказаў Валер Каліноўскі:


«Дзякаваць Богу, што ў Беларусі няма Сібіры, Калымы, а ў бабруйскай калёніі тое ж самае надвор’е, што ўва ўсёй Беларусі, тое ж неба. І лісты прыходзяць хутка: дзень-два і ўжо чытаеш».

Прадстаўнік «Вясны» у Горадні Віктар Сазонаў падтрымаў гэтыя словы:

«Я б хацеў дадаць, што гэта адна з заваёваў нашых, у тым ліку і Алеся Бяляцкага, што мы ня ў гэтай ўжо прасторы савецкай, дзе маглі б заслаць на Калыму, а ў незалежнай краіне жывем».

Удзельнікі сустрэчы напісалі пажаданьні Алесю Бяляцкаму на старонках нататніка, якія былі ўкладзеныя ў капэрту, каб адаслаць зьняволенаму ў бабруйскую калёнію.



Удзельнікі прэзэнтацыі кнігі "Справа Бяляцкага" ў Горадні 20 студзеня 2013 году
Удзельнікі прэзэнтацыі кнігі "Справа Бяляцкага" ў Горадні 20 студзеня 2013 году


Кніга пра Алеся Бяляцкага
Кніга пра Алеся Бяляцкага

Удзельнікі сустрэчы напісалі лісты Алесю Бяляцкаму
Удзельнікі сустрэчы напісалі лісты Алесю Бяляцкаму


Выступіў Андрэй Пачобут
Выступіў Андрэй Пачобут
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG