Старшыня арганізацыі ТБМ Мікола Маркевіч быў зьдзіўлены, калі даведаўся пра высяленьне, паколькі таварыства своечасова заплаціла за арэнду. Сёньня мы са спадаром Маркевічам наведалі жыльлёва-эксплюатацыйнае прадпрыемства Ленінскага раёну Горадні. Там яму выдалі афіцыйную паперу з такім зьместам: дамова аб арэндзе з ТБМ скасоўваецца, бо ў арандаваным памяшканьні без дазволу месьціцца гарадзенскі офіс газэты “День”, якую рэдагуе сам Маркевіч.
(Маркевіч: ) “Наколькі я зразумеў, Таварыства беларускай мовы высяляюць проста на вуліцу. Я думаю, што гэта працяг той самай сёньняшняй палітыкі дзяржавы — зьнішчэньне ўсяго беларускага”.
Ад камэнтароў для нашага радыё супрацоўніцы жыльлёва-эксплюатацыйнай службы адмовіліся. А вось самому Маркевічу сказалі, што ўсё нібыта можна залатвіць, калі ТБМ заключыць дамову аб субарэндзе з газэтай “День”.
(Маркевіч: ) “Я адзінаццаць разоў зьвяртаўся па рэгістрацыю для якой-небудзь газэты, і адзінаццаць разоў па надуманых прычынах гэтая ўлада адмаўляла нам у рэгістрацыі незалежнай газэты. Няўжо цяпер — на дванаццаты раз яны дадуць дазвол на тое, каб легальна існаваў карпункт газэты “День”?”
Дарэчы, мясцовыя ўлады не дазвалялі заснаваць сваё выданьне менавіта Таварыству беларускай мовы.