Лінкі ўнівэрсальнага доступу

НА БЕРАСЬЦЕЙШЧЫНЕ АДНАЎЛЯЕ ПРАЦУ ГРАМАДЗКАЕ АБ’ЯДНАНЬНЕ ІМЯ ТАДЭВУША КАСЬЦЮШКІ


Алег Супрунюк, Берасьце

Дзесяць гадоў таму на Берасьцейшчыне ўжо быў створаны фонд імя Касьцюшкі, але падчас распачатай беларускімі ўладамі кампаніі перарэгістрацыі грамадзкіх арганізацыяў, яму было адмоўлена ў працягу сваёй дзейнасьці.

Аднавіць працу ўдалося толькі цяпер, калі мясцовая “вэртыкаль” пагадзілася на рэгістрацыю Берасьцейскага міжраённага аб’яднаньня імя Тадэвуша Касьцюшкі. Мяркуецца, што гэтае рашэньне берасьцейскіх уладаў наўпрост зьвязанае з захадамі амбасады ЗША ў Беларусі спрыяць аднаўленьню сядзібы Касьцюшкі ў Івацэвіцкім раёне. На гэтыя мэты амэрыканская амбасада выдаткавала больш за 28 тысячаў даляраў, але паставіла ўмову, каб у справе аднаўленьня спадчыны бралі ўдзел і недзяржаўныя беларускія арганізацыі.

Як паведаміў старшыня новастворанага грамадзкага аб’яднаньня Леанід Несьцярчук, у плянах арганізацыі ня толькі аднаўленьне сядзібы ў Косаве, але і падрыхтоўка міжнароднай канфэрэнцыі, прысьвечанай Касьцюшку, супольная праца з польскім і амэрыканскім фондамі, што носяць ягонае імя.

Сябры аб’яднаньня таксама выступаюць з ініцыятывай вяртаньня імя Касьцюшкі адной зь берасьцейскіх вуліцаў і пабудове ў Берасьці помніка славутаму земляку.
XS
SM
MD
LG