Абодва апазыцыянэры выйшлі на сваю звычайную акцыю, якую яны праводзяць штопанядзелак. Аляксандар Салаўян меў пры сабе плякат “Схадзіў на выбары — падтрымаў рэжым”, а Ўладзімер Плешчанка — абвестку “Збор подпісаў супраць саюзнае дамовы, незаконна падпісанай Аляксандрам Лукашэнкам”.
Апоўдні ля “Сіняга дому” спынілася міліцэйская машина, і апазыцыянэраў забралі ў пастарунак. Склаўшы пратаколы, міліцыянты адразу ж даставілі затрыманых у суд, дзе судзьдзя, спадарыня Лакеенкава, па сканчэньні дзесяціхвіліннага судовага працэсу абвесьціла ім папярэджаньні за незаконнае пікетаваньне.
Абодва апазыцыянэры былі ўражаныя памяркоўнасьцю судзьдзі, бо дагэтуль у пераліку іхных судовых пакараньняў пераважалі грашовыя штрафы. Паводле іншае вэрсіі, прапанаванай спадаром Плешчанкам, адносна мяккае пакараньне яны атрымалі толькі з тае прычыны, што міліцыянты непісьменна склалі пратакол: яны не пазначылі, што гэта ўжо ня першае сёлета затрыманьне, і што ўсе папярэднія таксама мелі працяг у Чыгуначным судзе.
Усяго за пікетаваньне ля “Сіняга дому” спадары Салаўян ды Плешчанка былі асуджаны сёлета пяць разоў.