Судовы вырак пра ліквідацыю цэнтру моладзевых ініцыятываў “Контур”, вынесены судзьдзёй спадарыняй Матушайкес, ня быў нечаканым для ягоных сябраў, што сабраліся сёньня ў залі Віцебскага абласнога суду. На думку адказнага сакратара цэнтру “Контур” Сержука Серабра, гэтая судовая справа знарок ініцыявалася абласной управай юстыцыі, каб, абвінаваціўшы цэнтар у нявыплаце падаткаў ды неадпаведнасьці юрыдычнага адрасу фактычнаму месцу сустрэчаў “контураўцаў”, пазбавіцца ад актыўнай грамадзкай моладзевай суполкі.
(Серабро: ) “Мы, у прынцыпе, і не чакалі іншага выраку!.. Ну, што застаецца сказаць… Толькі тое, што пасьля зьнікненьня нашага ранейшага кіраўніка, Юрася Корбана, “Контурам” асабліва ніхто не цікавіўся, і актыўную дзейнасьць управа юстыцыі разьвіла толькі тады, калі ў Воршы пачала выходзіць наша газэта “Віцебская трыбуна”. І, паколькі “Контур” ёсьць заснавальнікам “Віцебскай трыбуны”, ягонае скасаваньне аўтаматычна ставіць пад пагрозу выхад гэтай газэты, і гэтае пытаньне мы будзем зараз вымушаныя апэратыўна вырашаць”.
Аршанскія выпускі “Віцебскай трыбуны”, паводле ініцыятывы “Контуру”, былі пачаткам праекту пашырэньня недзяржаўнага друку ў розных рэгіёнах Віцебшчыны. Аднак па выхадзе ўжо чацьвертага нумару газэты абласная ўправа юстыцыі пільна зацікавілася дзейнасьцю арганізацыі, а па выхадзе восьмага гэтай структурай ужо быў пададзены судовы пазоў.
Цяпер, каб захаваць права на выданьне газэты, а таксама правы на ўласнае існаваньне, рада “Контуру” мяркуе абскардзіць вырак пра ліквідацыю аб’яднаньня ў Вярхоўным судзе.