Я наведаў тры гарадзкія рынкі, і ўсюды прадавалі чарніцы і грыбы. Штопраўда, на Прывакзальным рынку гандаль ішоў не на тэрыторыі, а каля агароджы, побач з аўтобусным прыпынкам. Адна жанчына, што назвалася Надзеяй, прадала ўжо з паўвядра чарніц. Паміж ёю і пакупнікамі вялася такая гаворка:
(Пакупніца: ) “Ці ёсьць у чарніцах радыяцыя?”
(Надзея: ) “А бог яе ведае”.
Пацікавіўся ў жанчыны: дзе зьбіраліся чарніцы?
(Надзея: ) “Буда-Кашалёўскі раён, Чарнянскае лясьніцтва. Правяралі ў тым годзе, а ў гэтым — не. З гораду прыяжджаюць на машынах зьбіраць чарніцы”.
На Цэнтральным рынку, за рыбным павільёнам, з паўдзясятка чалавек прадавалі чарніцы і грыбы. Адна жанчына запэўнівала, што прывезла вядро грыбоў з Украіны. Маўляў, на мяжы мытнікі іх правяраюць на радыяцыю, але квіткоў не даюць.
Гамяльчук Уладзімер, які прадаваў падбярозавікі ды абабкі (3 тысячы за кіляграм) пераконваў, што ведае прыгарадныя лясы: дзе ёсьць радыяцыя, а дзе не.
(Уладзімер: ) “Прыбар, Шчэрбаўка — чыстыя. Чыжаўка — там брудныя. З Чыжаўкі далей на Палесьсе ідзе радыяцыя. Там і грыбы, і ягады брудныя”.
Аднак радыёлягі рынку сьцьвярджаюць іншае. Распавядае Валянціна Каржова:
(Каржова: ) “Найбліжэйшыя лясы — Цыкуны, Прыбар. Тут дзесьці палова ягадаў перавышае дапушчальныя ўзроўні забруджанасьці”.
Паводле Каржовай, забруджанасьць ягадаў складае ад 80 да 260 бэкерэляў пры дапушчальнай норме 185 бэкерэляў.
Амаль такая ж сытуацыя і з грыбамі. Чаму гэтым летам грыбы і ягады так набіраюць радыяцыю, адмыслоўцы патлумачыць ня могуць.
Дзяжурны доктар Віктар Ваўчанкоў вельмі зьдзівіўся, што на тэрыторыі рынку прадаюць грыбы і ягады. Абяцаў пакараць кантралёраў, якія пусьцілі грыбнікоў.
(Ваўчанкоў: ) “Зараз пойдзем кантралёраў пакараем. У Гомельскай вобласьці на ўсіх рынках забаронены продаж грыбоў і ягад”.