Паводле словаў лідэра Незалежнага прафсаюзу віцебскіх прадпрымальнікаў Анатоля Шапавалава, сёньняшні страйк на рынках Віцебску ёсьць адказам на бязьдзеяньне уладаў, якія ня здольныя абараніць прадпрымальнікаў ад уціску.
Яшчэ 24 лютага ў часе прадпрымальніцкага мітынгу, які праводзіўся ў абласным цэнтры, рынкавыя гандляры з усяе вобласьці прынялі адмысловую рэзалюцыю з 16 пунктаў ды перадалі яе мясцовым уладам.
Кожны пункт тае рэзалюцыі, па сутнасьці, быў патрабаваньнем адмяніць пастановы аблвыканкаму, якія ўскладняюць працу рынкавых прадпрымальнікаў. І ніводнае з гэтых патрабаваньняў не было задаволенае. Як не былі скасаваныя і прэзыдэнцкія дэкрэты №3 ды №4, супроць якіх пратэстуюць прадпрымальнікі ўсяе Беларусі.
Сёньняшні страйк ёсьць папераджальным. Аднак віцебскія прадпрымальнікі выказваюць намер з 1 красавіка наладзіць страйк бестэрміновы ды запрасіць далучыцца да яго ўсіх прадпрымальнікаў з рынкаў Воршы, Полацку, Наваполацку ды іншых гарадоў вобласьці.