Сэсія Ельскага райсавету ўстанавіла, што падаткі пры перасячэньні мяжы павінны плаціць ня толькі замежнікі, але і грамадзяне Беларусі, калі яны вяртаюцца з Украіны дамоў на ўласных аўтамашынах. За легкавік прадугледжаны збор 5 даляраў ЗША, за мікрааўтобус — 10, грузавік — 15 даляраў.
Але, як паведаміла загадчыца фінансавага аддзелу Ельскага райвыканкаму Валянціна Сьмяюн, рэальна на мяжы пакуль не сабралі ні цэнта. І не таму, што празь беларуска-ўкраінскую мяжу едуць толькі льготнікі — вэтэраны, дыпляматы, культурніцкія дэлегацыі, якім паводле рашэньня сэсіі райсавету ня трэба плаціць згаданы збор. Справа ў іншым.
Памежнікі кантрольна-прапускнога пункту “Новая Рудня” не жадаюць бачыць на сваёй тэрыторыі мясцовых зборшчыкаў падаткаў. Ня хочуць яны выконваць і функцыі кантралёраў мясцовых збораў. Загадчыца райфінаддзелу спадарыня Сьмяюн даслала сёньня камандзіру Гомельскага памежнага атраду палкоўніку Бутранцу, якому падначаленыя ельскія ахоўнікі мяжы, адмысловы ліст. У ім фінаддзел патрабуе зьмяніць стаўленьне да мясцовых збораў.
Не знаходзіць пакуль паразуменьня з памежнікамі ды мытнікамі й Гомельскі райвыканкам, хаця на падставе рашэннья сэсіі райсавету і ён павінен браць плату з замежнікаў на пункце пропуску “Новая Гута”.
У сваю чаргу камандзір памежнага атраду палкоўнік Бутранец зважае на тое, што закон пра мяжу не надзяляе ейных ахоўнікаў нейкімі кантрольнымі функцыямі ў зборы падаткаў. Няма на гэты конт і распараджэньня Дзяржкамітэту памежных войскаў краіны. Да таго ж мясцовыя зборы выклікаюць непаразуменьне ў тых, хто перасякае мяжу. Канфлікты, як мяркуе спадар Бутранец, адмоўна адаб’юцца на прэстыжы беларускіх памежнікаў. Будзе значна лепей, калі мясцовыя органы створаць асобныя пункты збору сродкаў.
Дарэчы, такім чынам паступілі ў Брагінскім раёне. Тут, паводле інфармацыі загадчыка райфінаддзелу Міхаіла Залугоўскага, зборы з замежнікаў пры перасячэньні мяжы на ўласным транспарце даручылі супрацоўнікам банку і мясцовага райаддзелу міліцыі. Беларускія грамадзяне ад збору наогул вызваленыя.
У Добрускім і Нараўлянскім раёнах, што таксама мяжуюць з Украінай, мясцовыя зборы пакуль не ўстанаўлівалі. І гэта нягледзячы на тое, што суседняя Ўкраіна зьбірае такія падаткі ўжо трэці год запар.