Высакародныя мужы…
Зямелькі беларускай дзеці…
О, Божачка, чаму, скажы,
Яны раськіданы па сьвеце?
Хто нашу еднасьць загубіў
І абыякавасьць пасеяў?
Міцкевіч Польшчу палюбіў,
А Дастаеўскі – дык Расею.
Змагар, вучоны і герой
Дамейка ў Чылі быў узьняты…
Сікорскі верталётны рой
Стварыў для большай моцы Штатаў.
Няма бэрлінскае сьцяны
На нашай мытні і сягоньня,
І беларускія сыны
З-пад Прыпяці і з Панямоньня
Знайсьці імкнуцца за мяжой
І шчасьця крышачку, і працы,
І нават на зямлі чужой
Згадзіліся б навек застацца.
Бацькоўскі край, радзімы кут!
Мае палі, мае бярозы!..
Ды хіба не патрэбен тут
Адважны дух і моцны розум?
