Сярод іншых, у Польшчы працуюць два чачэнскія інфармацыйныя Цэнтры – у Варшаве і Кракаве, “Камітэт Польшча – Чачэнія” – таксама ў Варшаве, і “Камітэт Свабодны Каўказ” з прадстаўніцтвамі ў Кракаве і Познані.
Гэтыя грамадзкія арганізацыі займаюцца інфармаваньнем польскіх грамадзянаў пра парушэньні правоў чалавека ў Чачэніі, пішуць артыкулы ды выдаюць у гэтай справе кнігі, а таксама арганізуюць вулічныя акцыі ў падтрымку чачэнскай незалежнасьці.
У аўторак Міністэрства замежных справаў Польшчы атрымала ноту, у якой Расея запатрабавала ад польскіх уладаў забараніць дзейнасьць, перадусім, чачэнскіх інфармацыйных Цэнтраў у Варшаве і Кракаве, якія часта называюць неафіцыйнымі амбасадамі Чачэнскай Рэспублікі.
Камэнтуючы патрабаваньні Масквы, прэзыдэнт Польшчы Аляксандар Квасьнеўскі сказаў наступнае:
(Квасьнеўскі: ) “Усе гэтыя ўстановы дзейнічаюць на падставе польскіх законаў, і пакуль яны будуць працаваць у адпаведнасьці з гэтымі законамі, няма ніякіх прычынаў, каб перашкаджаць іхнай дзейнасьці”.
А інфармацыі пра тое, што гэтыя арганізацыі, а таксама чачэнцы, якія знаходзяцца ў Польшчы, займаюцца падрыхтоўкай тэрарыстычных замахаў ці іншай супрацьзаконнай дзейнасьцю, паводле польскіх спэцслужбаў, няма. Гэта падцьвердзіў і прэм’ер-міністар Польшчы Лешэк Мілер:
(Міллер) “Паводле інфармацыі, якую я маю, сярод чачэнцаў, што знаходзяцца ў Польшчы, тэрарыстаў няма”.
У сваю чаргу, міністар замежных справаў Польшчы Уладзімер Цімашэвіч заявіў, што абвінавачаньні расейскага боку на адрас чачэнскіх інфармацыйных цэнтраў у Польшчы беспадстаўныя.
Варшава пакуль не даслала Маскве афіцыйнага адказу на ноту, аднак, беручы пад увагу меркаваньні кіраўнікоў польскай дзяржавы, няцяжка прадказаць, якім ён будзе. Тым больш, што менавіта ў гэтай справе ўрад і кіроўная кааліцыя маюць абсалютную падтрымку ўсіх палітычных сілаў парлямэнту. Гавораць дэпутаты Сэйму Ежы Яскерня і Марыюш Каміньскі:
(Яскерня: ) “Польшча мусіць вельмі ўважліва прыслухацца да сэнсу расейскіх патрабаваньняў – ці не зьяўляюцца яны празьмернымі. Польшча ёсьць краінай дэмакратычнай, свабоднай”.
(Каміньскі: ) “Расея ня можа цяпер ставіцца да Польшчы так, як у часы няволі, калі мы былі васаламі Расеі і яна магла груба ўмешвацца ў нашыя ўнутраныя справы”.
Калі не лічыць Турэччыны, дык пасьля Нямеччыны Польшча зьяўляецца другой краінай у Эўропе паводле колькасьці чачэнскіх уцекачоў. Толькі сёлета па палітычны прытулак да польскіх уладаў зьвярнуліся каля 2000 грамадзянаў Расейскай Фэдэрацыі чачэнскай нацыянальнасьці.