Лінкі ўнівэрсальнага доступу

Інструмэнтальная кампазыцыя “Карнавал”. Музыка народная, аранжыроўка Уладзімера Гінько. Ансамбль “Рагнеда”. Альбом “Ragneda”, “GMRS” (Германія), GEMA, 2002



Сьнежань-студзень — гэта такі пэрыяд, калі сьвяты крочаць літаральна адзін па адным. Вось чаму і існуе такое паняцьце, як калядныя канікулы, калі дзелавое жыцьцё амаль замірае. Газэты прапускаюць дзень па дні, рэклямадаўцы зьніжаюць актыўнасьць, і толькі “Мэлёдыя дня” стаіць на варце, падтрымліваючы ўсё той жа сьвяточны настрой. Прывітаньне!

Адной зь зімовых падзеяў, якая наступіць крыху пазьней, будзе традыцыйны зімовы фэстываль танца, цэнтрам якога здаўна зьяўляецца Рыё дэ Жанэйра. Падобныя карнавалы адбываюцца ў многіх краінах сьвету. У Беларусі ажыцьцявіць тое няпроста: усё ж асаблівасьці клімату не дазваляюць танчыць на вуліцах у адзеньнях, якія хутчэй угадваюцца на целе прыгожых дзяўчат, чым прысутнічаюць наяве.

Тым ня менш, гэтая традыцыя вядомая і ў нас, калі меркаваць па той музыцы, якая прагучыць сёньня. Гэта будзе інструмэнтальная п’еса “Карнавал”, што была запісаная для альбома ансамбля “Рагнэда” і выдадзеная сёлета ў Нямеччыне. У аснове музыкі — традыцыйныя мэлёдыі, беларуская, зразумела, і — нечаканасьць — бразыльская. Ідэя спалучыць гэтыя, здавалася б, зусім розныя традыцыі ў адной п’есе належала Ўладзімеру Гінько. І, як на маю думку, атрымалася ўсё вельмі дасьціпна, вынаходліва і арганічна.
XS
SM
MD
LG