Лінкі ўнівэрсальнага доступу

Песьня “Foxy Lady” Джымі Хендрыкса. “The Little Blues Band” Івана Маркава. Альбом “September 1997”, “Ковчег”, 1998 г.



У народзе кажуць: “Хітры, як ліс”. Як на маю думку, зь лісамі апошні час нешта нядобрае адбываецца: як не адкрыеш газэту, так і чытаеш жудасныя нататкі пра хворых на шаленства лісаў. Тым ня менш вобраз гэтага зьвера атрымаў добрае ўвасабленьне ня толькі ў прэсе ды казках.

Тым, хто скардзіцца на бедную палітру сучаснай беларускай музыкі, параю не рабіць скарасьпелых высноваў. Ёсьць у нас такія музыканты, якія, здараецца, надоўга зьнікаюць са сцэны. Ажно раптам узьнікаюць ня ведама адкуль, і тады робіцца зразумелым: іх музычная, выканальніцкая форма не выклікае апасеньняў.

Менавіта да такіх музыкантаў належыць гітарыст Іван Маркаў, імя якога зрабілася вядомым яшчэ ў час існаваньня групы “Студыя 7”, пасьля — “Бонды”. Гэта пры тым, што сам Іван як прыроджаны лідэр заўсёды схіляўся да каранёў і традыцыяў рок-музыкі — да блюзу.

У 1998 годзе выйшаў альбом ягонага трыо “Літл блюз бэнд”, запісаны ў студыі, але жыўцом, без далейшай апрацоўкі запісу. Гэта надало музыцы арганічнасьць, непасрэднасьць.

“Фоксі лэдзі” — так называецца вядомая п’еса Джымі Хендрыкса, якую Іван Маркаў прапанаваў выканаць разам у 1997 годзе бубначу Генадзю Дорфману і басісту Аляксандру Ваньковічу.

Іван Маркаў — сапраўды хітры ліс. Бо ніхто ня ведае, калі яго можна будзе пачуць са сцэны яшчэ раз. Ды ўсе ведаюць, што зроблена тое будзе належным чынам. Пачуемся заўтра!

Зьміцер Падбярэскі
XS
SM
MD
LG