Лінкі ўнівэрсальнага доступу

НАЦЫЯНАЛЬНЫ КАМІТЭТ АБ'ЯДНАНАЙ ГРАМАДЗЯНСКАЙ ПАРТЫІ ПАДСУМАВАЎ ВЫНІКІ ПРЭЗЫДЭНЦКІХ ВЫБАРАЎ


Альгерд Невяроўскі, Менск

Кіраўніцтва АГП прызначыла паседжаньне Нацыянальнага камітэту сваёй партыі празь месяц пасьля заканчэньня выбараў, каб даць магчымасьць сябрам гэтага органу адысьці ад перадвыбарчай барацьбы ды абмеркаваць тое, што адбылося 9 верасьня ў рэгіянальных структурах.

Такім чынам, сёньня некалькім дзясяткам сябраў Нацыянальнага камітэту прапанавалі падвесьці вынікі кампаніі "Прэзыдэнцкія выбары–2001", вызначыць стратэгію і тактыку АГП на будучыню, падсумаваць папярэднія вынікі акцыі "Хочам ведаць праўду!", вызначыцца ў справе далейшага ўдзелу партыі ў Кансультацыйнай радзе апазыцыйных партыяў пры групе АБСЭ.

Па кожным з гэтых пунктаў парадку дня сябры Нацкамітэту мусілі прыняць адпаведную рэзалюцыю. Вось што скзаў перад пачаткам паседжаньня старшыня АГП Анатоль Лябедзька:

(Лябедзька: ) "Што тычыцца шараговых сяброў партыі й рэгіянальных структураў, то думаю, што яны зрабілі максымальна з таго, што можна было зрабіць".

(Карэспандэнт: ) "А ў справе кампаніі "Хочам ведаць праўду"?"

(Лябедзька: ) "У АГП найбольшыя посьпехі якраз на гэтым кірунку дзейнасьці, і ў часе выбарчай кампаніі мы на гэтым сэгмэнце найбольш працавалі".

На думку спадара Лябедзькі, зь ягоным меркаваньнем пагадзіцца большасьць сяброў Нацыянальнага камітэту і прыме адпаведныя рэзалюцыі, а найбольш вялікі дакумэнт — "Стратэгія й тактыка партыі ва ўмовах аўтарытарнага рэжыму", мэта якога — зьмена цяперашняй сыстэмы ўлады, будзе ўхвалены, а канчаткова зацьверджаны на зьезьдзе АГП, які мяркуецца правесьці ў першым квартале наступнага году.

Але некаторыя сябры Нацыянальнага камітэту лічаць, што патэнцыял АГП у часе прэзыдэнцкай выбарчай кампаніі быў выкарыстаны ня цалкам. Гаворыць кіраўнік гомельскай абласной арганізацыі АГП (які, дарэчы, выказаў намер пайсьці ў адстаўку з гэтай пасады) Віктар Карніенка:

(Карніенка: ) "Калі браць апошнюю кампанію, мне здаецца, што ў партыі было больш пэрспэктываў для больш удалага дзеяньня ў часе гэтай выбарчай кампаніі. Патэнцыял партыі, я лічу, ня быў цалкам выкарыстаны".

Аналізуючы вынікі прэзыдэнцкай кампаніі Анатоль Лябедзька зазначыў, што гэта былі ня выбары, а разыграны ўладамі фарс, у якім ні перамагчы, ні прайграць было немагчыма. Паводле лідэра АГП, партыя выканала ўсе дамоўленасьці шырокай грамадзянскай кааліцыі, што ёсьць станоўчым фактам. Разам з тым Анатоль Лябедзька адзначыў, што была пераацэненая роля намэнклятуры, з асяродку якой быў вылучаны адзіны кандыдат.

Сябры АГП, на ягоную думку, былі расчараваныя вынікамі выбараў яшчэ й таму, што свайго кандыдата ў партыі не было, а ейныя актывісты падтрымлівалі ажно чатырох патэнцыйных прэтэндэнтаў. Многія зь сяброў Нацыянальнага камітэту, асабліва тыя, хто працаваў у штабе Сямёна Домаша, выказвалі меркаваньне, што трэба было адразу вызначыцца са сваім кандыдатам, а не спадзявацца на намэнклятуру й на Маскву, крытыкавалі сыстэму незалежнага назіраньня.

Дыскусія праходзіла даволі канструктыўна, і ў выніку ўсе рэзалюцыі, з тымі ці іншымі зьменамі, сябры Нацыянальнага камітэту АГП ухвалілі.

XS
SM
MD
LG