Гамяльчук Мікалай Зайцаў родам зь вёскі Новыя Юркавічы, Клімаўскага раёну, Бранскай вобласьці. Са сваімі малымі сынамі нядаўна Мікалай вёз у Новыя Юркавічы лекі для хворай маці, аднак памежнікі ўнукаў да бабулі ня пусьцілі. Спаслаліся на тое, што ў Мікалая няма зацьверджанай натарыяльна згоды жонкі на вываз дзяцей у Расею. Сыноў давялося пакінуць на беларускай тэрыторыі, у адной зь вёсак Добрускага раёну. Распавядае Мікалай Зайцаў:
(Зайцаў: ) “Заехалі ў вёску Кругавец, пастукаліся ў дом. Кажам, вазьміце нас, бо на мяжы не пускаюць. Бабуля хворая, трэба тэрмінова завезьці ёй лекі ў Новыя Юркавічы, у Расею. Сыны заставаліся ў Кругаўцы пяць гадзінаў. Прапусьцілі мяне аднаго, а дзеці чакалі на беларускім баку”.
Па тэлефоне я зьвязаўся з начальнікам аддзелу кантролю бранскага памежнага атраду, палкоўнікам Юрыем Прозаравым:
(Прозараў: ) “Гэта, пэўна, прыватны выпадак, прыкры такі, і прайшоў ён для нас не заўважаным. Мы на ўезд усіх прапускаем. Гэта на выезд расейскіх дзяцей патрабуем натарыяльную згоду бацькоў, калі нехта адзін вывозіць іх. Новаўвядзеньняў для беларусаў з нагоды ўсталяваньня памежнай зоны няма. Гэта для грамадзянаў Расеі ў пашпарт, як і раней, у стары савецкі час, ставіцца штамп, што зона памежная. Уезд у зону з расейскага боку будзе толькі з дазволу. Для грамадзянаў Беларусі ніякіх зьменаў пакуль няма”.
Пацікавіўся ў расейскага памежніка, а што будзе, калі, напрыклад, карэспандэнт прыедзе зь Беларусі ў памежную зону?
(Прозараў: ) “Кожны прыватны выпадак будзе разглядацца асобна. Праводзіцца разьбіральніцтва, а затым вяртаем вас у Беларусь — і ўсё”, — адказаў начальнік аддзелу кантролю бранскага памежнага атраду, палкоўнік Юры Прозараў.