МАСКВА. Расейскія кампаніі “Ітэра” й “Транснафта” заявілі, што з суботы, 24 студзеня, спыняюць пастаўкі газу ў Беларусь. Кампаніі паведамілі, што ўжо выканалі свае абавязаньні перад Менскам, прадугледжаныя кантрактамі на студзень. З 1 студзеня пастаўкі газу ў Беларусь спыніў таксама расейскі канцэрн “Газпром”. Намесьнік старшыні праўленьня “Газпрому” Аляксандар Разанаў заявіў, што Менск адкрыта сабатуе падпісаньне кантракту на пастаўкі газу ў 2004 годзе на рынкавых умовах. Кіраўнік “Белтрансгазу” Пётар Пётух назваў спыненьне паставак неўгрунтаваным. У сваю чаргу “Газпром” рэкамэндаваў беларускаму боку для аднаўленьня паставак тэрмінова падпісаць дагаворы зь незалежнымі дастаўцамі прыроднага газу.