БАГДАД. Сёньня памерла Акуіла аль-Хашэмі - адная з трох жанчынаў, што ўваходзяць у прызначаную ЗША Кіруючую Раду Іраку. Пяць дзён таму аль-Хашэмі была паранная, калі замахоўцы абстралялі яе аўтамабіль у цэнтры Багдаду.
З нагоды сьмерці Акуілы аль-Хашэмі, камандуючы кааліцыйным войскам ў Іраку генерал Рыкарда Санчэз зачытаў сёньня пасланьне цывільнага адміністаратара Іраку Пола Брэмэра, які цяпер знаходзіцца ў Вашынгтоне:
(Санчэз) “Праз сваё ўстойлівае імкненьне да дэмакратычнага, вольнага і мірнага Іраку доктар Акуіла аль-Хашэмі надхняла ірацкі народ. Мы аплакваем яе сьмерць. Але нават у часе смутку мы ведаем, што яе ўяўленьне пра будучыню Іраку будзе жыць і пераможа ў Іраку. Сёньня мы аддаем даніну асабістай мужнасьці спадарыні аль-Хашэмі і яе адданасьці працы на карысьць ірацкага народу”.
Акуіла аль-Хашэмі будзе пахаваная заўтра.
Раней сёньня выбухнула бомба каля багдадскага гатэлю, у якім, сярод іншага, месьціцца прадстаўніцтва амэрыканскай тэлевізыйнай кампаніі NBC. Гукаапэратар гэтай кампаніі быў лёгка паранены.
Між тым у родным горадзе Саддама Хусэйна Тыкрыце амэрыканскія жаўнеры арыштавалі дзьве асобы, якія, як паведамляецца, арганізоўвалі ды фінансавалі замахі супраць вайскоўцаў ЗША.
Яшчэ некалькі амэрыканскіх жаўнераў былі параненыя ў паўночнаірацкім горадзе Масул.