БАГДАД. Адзін амэрыканскі жаўнер быў забіты і тры параненыя сёньня ў выніку выбуху бомбы на дарозе непадалёк ад гораду Фалуджа. Яшчэ тры амэрыканскія жаўнеры былі параненыя сёньня ўначы ў выніку абстрэлу ракетамі на поўначы Іраку непадалёк ад гораду Масул.
Тым часам у сталіцу Іраку прыляцеў міністар замежных справаў Злучаных Штатаў Колін Паўэл. Ён правёў перамовы з тымі ірацкімі палітыкамі, якія, на ягоную думку, вызначаюць будучыню акупанавага Іраку. У прыватнасьці, пасьля перамоваў зь міністрам унутраных справаў Іраку Хашыярам Зэбары Паўэл адзначыў, што Злучаныя Штаты чакаюць прыняцьця новай канстытуцыі Іраку, пасьля чаго перададуць уладу ў краіне народу Іраку. Паўэл мяркуе, што гэта магло б адбыцца напрыканцы будучага году, але будзе залежыць ад сытуацыі зь бясьпекай у Іраку.
Міністар замежных справаў Гішпаніі Ана Палачыа сёньня таксама наведала Ірак. Яна сустрэлася з прадстаўнікамі гішпанскіх і паўднёваамэырканскіх войскаў, якія зараз знаходзяцца ў Іраку. Спадарыня Палачыа правяла перамовы з доктарам Раджа Хабіб аль-Зухааі, якая была абраная сябрам Кіраўнічай Рады Іраку. Зараз у Іраку знаходзяцца 1200 гішпанскіх жаўнерў, прыблізна гэткая ж колькасьць паўднёваамэырканскіх вайскоўцаў прыляціць у Ірак цягам двух тыдняў.
Міністар водных рэсурсаў Іраку Абдул Лаціф Рашыд сёньня заявіў, што вады Тыгру і Эўфрату не хапае Іраку дзеля задавальненьня ягоных патрэбнасьцяў. Міністар распачаў перамовы зь Сірыяй ды Турэччынай, якія таксама карыстаюцца вадой гэтых дзьвюх рэк, каб разьдзяліць ваду паміж трыма краінамі.