Ерусалім Міністар замежных справаў Ізраілю Сільван Шалом заявіў, што палестынскага лідэра Ясера Арафата трэба выслаць за межы палестынскіх тэрыторыяў. Прычынаю такой неабходнасьці Сільван Шалом назваў адстаўку памяркоўнага прэмьер-міністра Палестынскай аўтаноміі Махмуда Аббаса. У адказ на заяву Шалома палестынскі міністар замежных справаў Набіль Шаат заявіў, што высылка Арафата будзе мець разбуральныя наступствы для мірнага працэсу ў рэгіёне.
Адстаўка Аббаса паставіла пад сумнеў рэалізацыю пляну блізкаўсходняга ўрэгуляваньня “дарожная мапа”.
ЗША выказалі спадзеў, што палестынскі парлямант працягне паўнамоцтвы Аббаса ў барацьбе з тэрарызмам. Занепакоенасьць адстаўкаю кіраўніка палестынскага ўраду выказаў і Эўразьвяз.