БАГДАД У Іраку не спыняюцца ўзброеныя напады. Сёньня ў Басры, у брытанскай зоне адказнасьці, была двойчы абстраляная штаб-кватэра шыіцкай партыі Аль-Дава. Ніхто не пацярпеў. Гэтай ноччу каля Тыкрыту з мінамётаў была абстраляная група іракцаў, якія працуюць разам з амэрыканскімі салдатамі.
Каля 5 тысячаў іракцаў правялі сёньня дэманстрацыю у паўночным горадзе Кіркук, яны патрабавалі вызваленьня мясцовага палітыка, які быў арыштаваны амэрыканскімі войскамі па абвінавачваньні ў датычнасьці да дывэрсыяў на нафтаправодзе.
У правінцыі Васіт украінскі салдат забіў ірацкага кіроўцу, які не спыніўся на кантрольна-прапускным пункце.
На поўдзень Іраку сёньня прыбылі яшчэ 120 брытанскіх салдатаў. Брытанскі ўрад разглядае пытаньне аб накіраваньні ў Ірак дадаткова 3 тысячаў салдатаў.